Mas mapahiyumong ugma
Niabot og 151 ka bata ug dagkong pasyente ang nakaparehistro alang sa libreng operasyon sa mga may bitas sa ngabil ug lungag sa lingagngagan sa Sugbo ug kasilinganan nga mga lalawigan. Tinuig ning proyekto sa Kiwanis Club of Cebu, Operation Rainbow Australia ug ABS-CBN Central Visayas. Sa ikaduhang sunudsunod nga tuig karong tuiga, ang libreng operasyon gipahigayon sa Dr. Ignacio M. Cortes General Hospital sa kinapusoran sa Mandaue City.
Naatol sab ang kalihokan sa tibuok buwan nga pagsaulog sa ika-19 nga anibersaryo sa DYAB Abante Pa, Bisaya! Nga atubangan sa sunudsunod nga katalagman sa Kabisay-an, nipakayab sa tema nga, “Pag-unong sa katawhan pagbarug nga mas kusgan.â€
* * *
Gitapos ang rehistrasyon niadtong Domingo, Hunyo 8, kanus-a gihimo ang physical screening sa mga doktor gikan sa Australia ug mga boluntaryo gikan sa Sugbo. Matud ni Steve Hann sa Kiwanis Club, nga maoy tagduma sa proyekto, 94 ka pasyente ang nakapasar alang sa operasyon human sila nakaplagan nga himsog ang panglawas ug naghupot sa gitakdang timbang ug pangedaron.
Gisugdan dayon ang operasyon niadtong Domingo sa hapon. Giuna ang mga pasyente gikan sa Bohol, Negros Oriental, Leyte ug ubang mga lalawigan. Magpadayon ang operasyon hangtod karong Sabado, Hunyo 14, igo nga maalim nang operasyon sa mga pasyente ug makapauli na sa tagsatagsa nila ka pinuy-anan.
* **
Gipahibawo ni Flor Streegan, kanhi presidente sa Kiwanis Club, nga sama sa nangaging katuigan gitanyagan nila og libreng pinuy-anan ang mga pasyente nga taga lagyo. Aron nga di na mahasol sa taas nga biyahe pagtunga sa gitakda nga adlaw sa ilang operasyon.
Gihatagan sab nila og plitehan ang mga tagtungod sa pasyente nga taga Sugbo aron nga di maglisod sa pagda sa pasyente sa tambalanan ug pauli. Matud ni Streegan gipanghatagan sab nila ang mga batang pasyente og mga duwaan ug coloring books aron nga may kalingawan sa temporaryo nilang pinuy-anan samtang nagpaabot sa ilang turno sa operasyon.
* * *
Magbalhin-balhin unta sa nagkalainlaing lalawigan sa Pilipinas ang Operation Rainbow Australia pagpangopera sa mga bata nga may bitas sa ngabil ug lungag sa lingagngagan. Apan human nila gikatambayayong ang Kiwanis Club ug tungod sa kadaghan sa mga pasyente sa Sugbo ug kasilinganang lalawigan nagtultol na sila dinhi matag tuig.
Di adunahang mga boluntaryo sa Operation Rainbow Australia. Silang Wilma Dunne ug kaubanan nangunay pagtigom og mga hinabang sa Australia ug pag-andam sa mga panginahanglan. Ibilin nilang tanang madalang kahimanan sa tambalanan nga himoan sa operasyon. Di taphaw ang ilang tabang kay gida sa Australia ang mga pasyenteng komplikado og mga kaso sa nangaging katuigan. Pagpauli sa mga pasyente sa ilang mga pamilya dinhi sa ato, tam-is nang mga pahiyom ug mas masaligon nang niatubang sa mas masaarong ugma.
* **
- Latest
