Magsuon wa makauyon sa gibiling kabtangan sa ilang ginikanan

Dear Atty. Divine,

Maayong adlaw kanimo. May problema ko bahin sa gibilin nga balay ug yuta sa among ginikanan. Walo kami ka magsuon apan kami ra nga lima ang mosugot nga ibaligya namo ang among kabilin ug ang tulo namo ka igsuon dili man mosugot. Mamahimo ba kini namo nga ibaligya? Unsa may angay namo nga buhaton aron makuha namo ang among bahin kay naglisud intawon  kami sa among kahimtang karon. Daghang Salamat. --Jun

Dear Jun,

Kamong walo ka magsuon makonsiderar nga co-owners sa kabilin nga balay ug yuta sa inyong ginikanan. Matag usa kaninyo adunay usa ka bahin. Basi sa balaod ang mga co-owners sa property mamahimo nga modemanda og partition buot ipasabot nga buakon ang property ug inyong bahinon, kay sa higayon nga mabuak na kini then mamahimo na kamo nga mobaligya sa inyong bahin ug di na kamo magkinahanglan og pagtugot sa ubang igsuon. Apan kun ang yuta nga gibilin kaninyo mao ra usab ang gitarukan sa balay maglisud mo sa pag-partition niini kay dili man mahimong buak-buakon ang usa ka balay, busa ang labing practical nga solution niini mao ang pagbaligya sa property ug bahinon ninyo ang halin. Apan kun ang tulo ninyo ka igsuon dili mosugot nga ibaligya ang maong property then adto nila itanyag ang inyong bahin, sa ato pa, silang tulo ang baligyaan ninyo sa inyong share aron silang tulo na ang makapanag-iya sa property. Kun dili sab sila mobayad o mopalit sa inyong share mas maayo nga inyo ning ipadangat sa barangay aron adto kamo mag-abot ug sulbaron ang maong problema. Mas maayo man gud nga mag-atubang g’yud mo aron inyong mapaminaw ang ilang habig ug mapaminaw ‘sab nila ang inyong side. Mas maayo nga areglohon ninyo ang problema nga dili moabot sa hukmanan kay sa korte dugay mahusay ang inyong problema. Hinuon kun balaod ang basihan, kamong lima ka magsuon adunay katungod nga mobaligya sa inyong share. Apan kun ang property naka-pangalan pa sa inyong ginikanan nga namatay kinahanglan gyud nga mo- execute kamo og Extra Judicial Partition with Sale sa share ninyo’ng lima ka igsuon ug ang maong dokumento kay Extra Judicial Partition man magkinahanglan g’yud og pirma ninyong tanan lakip na sa inyong tulo ka igsuon. Busa gikinahanglan gyud ang kasabutan ninyong tanan nga mga heirs. Hinaut nga akong natubag ang imong mga pangutana. Thanks and God Bless.

— Atty. Divine