Nangatulog ra mo?

Tungod sa kapakyas sa Task Force Mendicancy sa dakbayan sa Sugbo paghipos niini’ng mga makililimos dinhi sa dakbayan, giawhag na lang nako ang pangulo sa City Environmental Sanitation Enforcement Team (CESET) nga sila na lang ang molihok sa wala matrabaho sa grupo nga gipangulohan ni Betty Ganub.

Gipasalig ni Grace Luardo nga maoy hepe sa CESET nga panghiposon niya kini’ng mga makililimos nga anaa magsigi’g pakilimos sa karsada, ug target nila ang mga motorista, bisan og baskog pa kaayo ang ilang panglawas.

Makita nimo ang mga makililimos nga anaa sa atubangan sa seminaryo sa Pope John Paul II Avenue, naa sa eskena General Maxilom ug M.J. Cuenco Avenue, Gorordo Avenue atubangan sa Colegio dela Inmaculada Concepcion ug daghan pa nga mga dapit.

Kining lalaki nga Badjao nga anaa magpakilimos sa Gorordo, baskog pa kaayo’g lawas apan kun moduol na sa mga motorista aron magpakilimos pagpaluya-luya dayon aron kaloy-on. Gihagit nako si Luardo nga hiposon kini’ng mao’ng tawo. Makapikal kaayo kay anaa siya maglakaw-lakaw taliwala sa karsada nga peligroso kaayo nga imo’ng madumbolan.

Tungod sa kapakyas sa Task Force Mendicancy pagtuman sa ilang tahas paghipos sa mga makililimos usahay makaingon ko nga wala ba kaha mausik lang ang kwarta nga gigasto sa kagamhanan alang kanila?

Adunay balaod nga gihimo ang nasudnong’ kagamhanan panahon ni kanhi presidente Marcos nga magsilot sa mga magpakilimos nga baskog pa og panglawas ug kadtong mohatag kanila og mga limos.

Apan ang pangutana, aduna ba’y nadakpan? Makalagot man gud kaayo kay kining mao nga mga makililimos mora’g nagtuo na sila nga kaakohan sa mga motorista nga mohatag kanila og limos.

Nakabantay ko nga ang mao nga makililimos kun hatagan sila sa mga motorista nga magsakay og mga awto ug ubang sakyanan, moderitso lang sa paglakaw nga mora’g walay nahitabo. Bisan pagpasalamat na lang, wala g’yud.

Ang makililimos nga Badjao nga anaa mag-standby atubangan sa Colegio dela Inmaculada Concepcion akong gipangutana ngano’ng magsigi siya’g pangayo, apan dili makasabot. Magkayuring lang, unya isog og tinan-awan. Diha’y higayon nga sa paglakaw niya kay wala man ko mohatag, gilingi pa ko nga arogante g’yud kaayo. Kini maoy rason nga gihagit nako ang mga sakop ni Grace Luardo nga kamo na la’y himo sa trabaho nga wala himoa ni Betty Ganub.

Pipila ka adlaw gikan karon, moatubang na usab sa mga sakop sa media ang Anti-Mendicancy Task Force ug mopasiatab na usab ug mangangkon nga nakatuman sila sa ilang katungdanan.