Solo parents angay’ng tabangan?

Sigurado nga mag-ambahan paingon sa Cebu City Hall ang mga “solo parents” aron pag-apply sa P5 mil nga tabang-salapi kun aprobahan g’yud sa City Council ang ordinansa nga magpahatag og financial assistance kanila kada tuig.

Ang Republic Act 8972 – Solo Parents Welfare Act – naglatid nga katungod sa mga opisyal sa kagamhanan ang pagtabang niadtong mga ginikanan nga nagbinugtong lang pag-atiman sa iyang anak. Wala maglatid ang balaod nga hatagan sila’g salapi.

Apan walay balaod nga masupak kun ang dakbayan sa Sugbo mohatag og tabang-salapi sa mga solo parents basta may subra lang kini nga kuwarta nga magamit.

Karon kapin lang sa usa ka libo ka solo parents ang nangayo’g tabang sa Department of Social Welfare and Services (DSWS) pinaagi sa huwam nga salapi.

Kun sabton pag-ayo ang gisugyot nga ordinansahon ni Konsehal Gerardo Carillo, apil sa isipon nga solo parents kadtong mga asawa nga ang bana nabilanggo. Duna ra ba’y uban nga drug pusher ang bana, unya drug pusher ‘sab ang asawa apan wala lang madakpi. Apil ‘sab sila nga makadawat?

Ang mga asawa o bana nga gusto na nga makigbuwag sa ilang kapikas apil usab nga ilhon nga solo parents kun ma-annul o kaha madeklarar nga inbalido ang ilang kasal.

Pipila lang kini sa daghan nga mga punto nga angay’ng tukion pag-ayo mao nga kinahanglang tun-an gayud kini sa atong mga magbabalaod sa dakbayan.

Welcome  US Pres. Barack  Obama

Ni Wen Celen

Daghang nangutana sa Espada kun asa sila kapalit og NFA rice sa kamerkadohan. Kini  tungod  sa awhag  sa taga NFA nga daghan  kaayo sila og bugas nga tag P27 ra ang kilo. Kaayo baya  niining  prisyoha  apan  asa man tuod mapalit  ang maong  bugas.

Sa kamerkadohan nagpasad ang  mga  commercial rice nga tag P50 kapin  ang  prisyo kada kilo.

Labing  menus  nga  presyo mao ang P42, nga lagum-lagom na ang  hitsura, apan  hinuon  makaon  lang  gihapon.

Apan  kun  tinuod nga tag P27 ra ang  NFA rice, maayo baya  tingale  nga ipahibawo sa taga  NFA  ang  tindahan  nga namaligya  niining  bugasa.

Kay kun  magpunay  lang  og  pagarpar  nga barato  kaayo ang  prisyo  apan  wa diay, usa kini ka  matang  sa pagpanluko ngadto sa mga  kabus.

* * *

May nangutana nganong wa may umento sa suweldo sa mga trabahante sa gobyerno ning  administrasyon ni PNoy. Way ikatubag  ang  Espada  niini, kay  ang  bugtong  nasayud  ning  tanan  mao  ra  si PNoy mismo.

Hinuon wa pa man matapos  ang  iyang  termino, basin  sa katapusang  tuig  sa iyang  pagserbisyo isip  pamuno nasud iyang pintahon  ang paghatag  og  kaayohan  sa mga  kawani  sa kagamhanan.

Ang Kongreso  wa usab  maghunahuna ning  isyuha  kay  kasagaran kanila  naglibog pa unsaon pagsalbar sa ilang  kaugalingon   gikan s a isyu  bahin  sa PDAF scam.

Ang  uban  miingon  nga kun  wa gyud, aw unsaon  ta man basin  sa sunod  nga  administrasyon, may  kalipay   na  kini  nga ikahatag  ngadto sa   minilyon  ka  empleyado  sa  kagamhanan.  

Ang pangutana mao,  kinsa kahay  kawatang   opisyal  ning  administrasyona  nga  unya  na  pasakai og  kaso sa sunod  administrasyon?

* * *

Karong  adlawa  gitakda  nga  moabot si US Pres. Barack Obama sa Manila. Kini aron iyang ipakita  nga sinsero sila sa ilang gisaad nga suporta   sa Pilipinas  ilabi  na  sa  krisis  nga  nasinatian niini  sa  kagamhanan  sa China.

Apan  ang grupo sa mga  komunista  nangandam  usab  nga mosalida   pinaagi  sa pagpahigayon og rally  batok  sa gitinguha   ni Obama. Wa silay gusto  nga tabangan sa US  ang Pilipinas, kay alang kanila mas maayo silang  mga komunista  kay  sa America.

* * *

([email protected])