Dili gikan sa Bibliya

Sa Semana Santa daghang kalihokan ang mga Katoliko. Dunay Bible Study. Gihisgutan nila ang paghugas ni Jesus sa mga tiil sa mga apostoles. Pagsilbi sa isig ka tawo ang simbolo sa maong hitabo. Busa ang pangulo sa Bible Study nagpili og lima ka grupo sa mga batan-ong nisalmot sa Bible Study.

Gipalakaw sila gawas sa kombento diin gitakda ilang kalihokan. “Kun si Jesukristo nia pa karon, paghunahuna mo unsay iyang buhaton sa balig duha ka oras lang. Isipa ninyo nga kada grupo ninyo, naa si Jesukristo.

Pangita mo og tawong masilbihan bali’g duha ka oras. Unya balik mo, ug isugilon ninyo ang inyong nabuhat” ni Brother Socrates, usa ka seminarista nga maoy pangulo sa Bible Study. Nanglakaw ang mga grupo ning sayong hapon.

Paghibalik nila human sa duha ka oras, nagtagsatagsa og report ang mga grupo. Ang unang grupo nanglimpiyo sa balay sa usa ka tiguwang biyudo. Ikaduhang grupo namalit og ice cream sa mga biyuda nga biyata. Ikatulong grupo niduaw sa mga masakiton sa ospital. Ikaupat nga grupo nangharana sa mga tiguwang sa usa ka home for the aged.

Daghang niagulo pagkadungog sa report sa ikalimang grupo. Niadto sila sa Pastor sa Sabadista. Gipangutana nila kun may kaila ba ang pastor nga nagkinahanglan og tabang. Gidala sila sa balay sa tiguwang nga babaye. Bali’g duha ka oras, gilimpiyohan nila ang tibuok balay ug nataran sa tiguwang. Gipang-trim ang mga tanom palibot sa balay. Pagkahuman, nagpasalamat ang tiguwang. “Kamong mga batan-on nga Sabadista, matinabangon kaayo nako’ dugang sa tiguwang.

“Sabadista!” naisa ang tingog ni Bro. Socrates. “Dapat ginawong ninyo ang tiguwang. Nga dili mo Sabadista! Katoliko!’  “Wa na lang namo sultihi si Manang. Para namo, dil to importante. Kay si Jesukristo wa man magdala og ngalan sa tinuohan” matud sa mga batan-on.

Nanglipaghong si Bro. Socrates. Wa siya katingog sa iyang nadungog. Ug may nakat-onan siya nga dili gikan sa Bibliya.