EDITORIAL - Kugihan lang kun mangaplay

Adunay mga tawo nga kun mangita pa gani’g trabaho ipakita g’yud nila nga sila kugihan, buotan ug uban pa nga maayo nga lihok aron dawaton sila sa ilang giaplayan.

Apan kun madawat na gani sa trabaho, ilabi na og maabtan na og pipila ka tuig, anha diha nga mogawas na ang tinuod nila nga bulok – ang pagkatapolan.

Bisan asa nga trabahoan anaa gayud kini’ng mao nga matang sa mga kawani nga mahadlok nga makatrabaho sila og subra sa oras ngadto sa ilang kompaniya.         

Sa pagtak-op sa klase pipila ka adlaw gikan karon, laing hut-ong na usab sa mga tinun-an ang mogradwar sa tagsa-tagsa nila ka kurso ug ang uban kanila dili na usab makatrabaho.

Dinhi nga bahina ang business sectors makatabang aron kadtong nanginahanglan og trabaho makasulod pinaagi sa pagtaktak niadtong mga ligoy nila nga kawani.

Dili mouswag ang kompaniya kun ang iyang mga kawani kusog lang mangayo og umento sa sweldo apan tapolan nga motrabaho.

Sa ubang kompaniya dili sayon ang pagsulod og trabaho kay daghan ka pa og agian nga oral interview ug written examination mao nga dili angay’ng magbinuang ang usa ka kawani kun makasulod na sa trabaho.

Pinaagi sa pagbaton kanunay og kakugi, anugnan ang kompaniya nga motaktak sa kugihan nga kawani ug dili madugangan ang gidaghanon sa mga walay trabaho.