Ang politika sa TCC

Apektado na ang mga tinun-an, ilabi na ang mga mogradwar nga mga tinun-an sa Talisay City College tungod sa padayong panag-ilog kun kinsa nila ni Dr. Paulus Cañete ug Richel Bacaltos ang ilhon nga presidente sa nahisgotang tunghaan.

Si Bacaltos tinudlo ni kanhi mayor Soc Fernandez nga naglingkod karon nga konsehal samtang si Dr. Cañete tinudlo sa kasamtangang mayor nga si Johnny V. Delos Reyes.

Isip presidente, si Bacaltos mopahigayon sa ilang graduation karong buwan sa Abril samtang isip presidente, mopahigayon usab sa ilang graduation si Dr. Cañete unya sa katapusang sa Marso. Kun walay kausaban, murag kaduha mopaso ang mga mogradwar nga mga tinun-an sa Talisay City College.

Kun wala ko masayop, ang bangi nagsugod dihang gihulipan ni Mayor Delos Reyes si Bacaltos isip presidente sa Talisay City College. Maoy gihulip kaniya si Dr. Paulus Cañete.

Si Bacaltos nagdumili sa pagbiya sa iyang position tungod sa rason nga ang mga sakop lang sa Board of Trustees ang makahulip kaniya sa katungdanan. Apan girason sa mayor nga aduna siyay gahom sa paghulip kang Bacaltos sa katungdanan tungod kay una, officer in charge lang ang naulahi ug siya na karon ang chairman sa Talisay City College Board of Trustees.

Simple lang ang nagpaluyo niining tanan ug kini walay lain - politika. Kun dili pa tungod sa politika linaw gyod unta ang dagan sa tunghaan ug wala silay suliran. Pero tungod sa politika mao ni karon ang iyang gidangatan.

Kun dili pa tungod sa politika, dili mamugos sa iyang kaugalingon si Richel Bacaltos sa pagpabilin isip presidente sa tunghaan kun wala siya mauyoni ni Mayor Delos Reyes. Kun dili pa tungod sa politika, nagkatigum na unta ang mga sakop sa Board of Trustees sa tunghaan aron hukman kun ipabilin pa ba isip pangulo si Bacaltos. Pero tungod sa politika, dili moabot sa husto nga gidaghanon sa mga sakop sa Board of Trustees ang nanambong sa gipatawag nga tigum sa mayor. Si Bacaltos dili usab kini siya ini kaisog kun wala pa kini gisandigan nga dakong politiko nga ang misyon karon mao ang pagsamok-samok ni Delos Reyes aron dili kini makaporma sa iyang pagdumala sa kagamhanan sa dakbayan sa Talisay.