Ang People Power sa EDSA

Daw naibtan og tunok ang katawhang Pilipinhon dihang napalagpot sa katungdanan si anhing Presidente Ferdinand Edralin Marcos tungod sa makasaysayanong  People Power Revolution sa EDSA sa pagtuo nga  mahingpit na usab sa pag-angkon  ang gitinguhanga kagawasan sulod sa 20 ka tuig niining pamunoan.

Ang mao niyang pamunoan napuno sa pasangil sama sa gihikaw nga kagawasan,  naputos sa anomaliya sa pagpangurakot sa mga opisyal sa kagamhanan, wala’y kaangayan ug napuno sa panaugdaug nga nakaingon sa gihambin nga kalisod sa  kinabag-ang kabus sa nasud nga maoy nagduslit sa pabilo sa pag-ulbo sa People Power Revolution sa EDSA  niadtong Pebrero 1986.

Matud pa nila nga ang pagkanaug ni Presidente Marcos sa katungdanan daw nabuhi usab ang ilang paglaum sanglit niadtong higayona  maoy ilang nakita ang pagsubang sa bag-ong bidlisiw sa adlaw nga nagdan-ag  sa mangiob na nga paglaum.

Daghan ang nag-ingon nga dihang mikanaug si anhing Presidente Marcos sa iyang katungdanan daw mihugyaw ang katawhang Pilipinhon sa hilabihang kahinangop sa pagtuo nga ang pagpadayon sa iyang pamuno-an  mao usab ang nagpig-ot sa ilang pag-angkon sa gipangandoy nga tingusbawan.

Dugang pa nila nga ang tingusbawan nga maoy mag-abli sa paglingkawas sa kalisdanan kay  lagi niadtong panahona natisok man sa matag alimpatakan sa katawhan ang pagbasol sa iyang pangagamhanan nga maoy nakahaling sa pag-ulbo sa katawhan nga mipakita isip labing gamhanan nga nakaingon sa pagkapukan sa iyang  pamunoan.

Tuod man nabag-o ang pangagamhanan sa nasud sa paglingkod sa katungdan sa nagsunod nga mga namunoan  hangtod na karon sa  kasamtangang administrasyon ni Presidente Benigno Aquino III nga taliwala sa pagpasiatab alang sa paglimpiyo sa pangurakot apan wala gihapon makalingkawas sa mga pasangil sa anomaliya nga binuhatan sa mga opisyal sa iyang pamunoan.

Ug ang siyagit sa katawhan kaniadto sa panahon pa sa mga nangaging presidente sa nasud  nga pag-antus sa hilabihang  kalisod  sa gihapon nagpadayon ubos sa naandan nga pagtuo nga ang duol sa luwag maoy nabusog.