Milagro ni Sto. Niño

Sa makausa pa, gipamatud-an nga adunay milagro nga mahitabo niadtong mga tawo nga wa’ magmakuli sa pag-ampo ug pagpanghinaot.  Kinsa’y magtuo nga ang giisip nga uwanon nga piyesta senyor, usa diay ka kasaulogan nga hapsay, malinawon ug labaw sa tanan—maayo ang lakat sa panahon.  Sa tinuod lang, usa ko sa mga nabalaka nga mobunok ang uwan niadtong adlaw nga Sabado atol sa fluvial procession.  Nangandam na kong daan kun o galing makanselar ang prosesyon sa dagat tungod sa dagkong bawod ug kusog nga bunok sa uwan.  Isip executive producer sa programang Tubag, akong gihuna-huna nang daan unsay mahitabo sa akong anchor nga si Leo Lastimosa kung mabasa sa uwan, sa mga ekipo ug sa kapin baynte ka mga crew.

Pasado alas say’s sa buntag niadtong Sabado, tataw kaayo nga nagdagan ang uwan gikan sa bukirang bahin sa dakbayan sa Sugbo paingon na sa among nahimutangan sa Ouano wharf kung diin manukad ang prosesyon.  Gani nakasinati na mi og mga pagtaligsik.  Sa akong huna-huna—kini na ang usa sa labing lisud nga live coverage.   Gawas nga mokusog ang uwan, magkapuliki ang tanan sa pagtang-tang sa mga ekipo padung sa simbahan ni San Jose sa Mandaue kun o galing ikanselar ang prosesyon.  Ang foot procession ang nahuna-hunaan nga paagi kun o galing hingpit nga mobati ang lakat sa panahon.  Kaming tanan, nanagana nang daan sa unsay posibleng senaryo kung di’ itugot sa panahon ang tinuig nga fluvial prosesyon.

Apan sa makausa pa, gipamatud-an ni Senyor Sto. Niño ang iyang gahum ug tinguha.  Sa dihang niabot na ang iyang imahen sa pantalan, kalit nga nihayag ang kalangitan, nawa’ ang uwan nga nagdagan padung sa among nahimutangan.  Labaw sa tanan, usa ka naglana nga dagat ang among nakita hangtud na sa tibuok nga rota sa iyang prosesyon.  Makapanlimbawot sa balhibo ang maong kasinatian labi pa nga di’ ni ang unang higayon nga kalit nga ning nindot ang panahon luyo sa mga paghulga sa hangin ug dagkong bawod.  Upat ka tuig na ang nakalabay, nakasinati ‘sab og bating panahon atol sa fluvial procession.  Nagtuo ang tanan nga makanselar ang tinuig nga kasaulogan, apan dihang paingon nang magsugod ang kalihukan, nihayag ang kalangitan ug adunay nakitang duha ka bangaw sa mismong rota nga agi-an sa iyang imahen.

Sa makausa pa, gipamatud-an sa mga sama nako ang kwestiyonableng pagtuo.  Apan sa katapusan adunay mga insidente nga magpamatuod nga di’ igo ang mga pagduda itandi sa iyang gahum ug tinguha aron tumanon ang mga giampo ug mga gipanghinaot.  Samtang nagsayaw sa kadalanan ang libuan ka mga dancers ug nagtabok ang minilyon ka mga nisaksi sa Sinulog grand parade, adunay mga pagpanghulga sa uwan.  Tinuod, nakasinati ‘ta og mga pagtaligsik.   Apan maayong panahon na kadto kung atong isipon sa usa ka nasud nga karon padayong gihulga sa labing unang bagyo ning tuiga nga si Agaton.  Kinsay magtuo nga naluwas ang Sugbo sa kusog nga bunok sa uwan apan ang silingan ra kaayo nga lalawigan sa Bohol, pirting antos sa kusog nga pag-uwan.

Milagro kung tan-awon ang maayong panahon nga nasinati sa Sugbo atol sa kapiyestahan ni Senyor Sto. Niño.  Apan daghan pang milagro ang nahitabo sa matag usa ka nato. Milagro kung tan-awon nga imong nakompleto ang siyam ka adlaw nga novena bisan sa mga pagsuway ug mga kakulian.  Milagro nga isipon nga nanimba ang mga sakop sa imong pamilya nga kaniadto gahi nga awhagon sa pagduaw sa Basilica Minore del Sto. Niño aron sa pagtambong sa misa.  Milagro nga maisip nga kung unsa ka daghan sa mga tawo nga nitan-aw sa festival, mas daghang tawo pa ang nagsu’d gawas sa pilgrim center aron sa pag-ampo ug pagyukbo sa Balaang Bata.

Milagro nga maisip nga imong makit-an ang mga Koryano nga wa’ lang magsuroy-suroy sa Sugbo apan niuban sa prosesyon ug nag-ampo sama sa gibuhat sa mga katoliko.  Milagro nga matawag nga nikalit lang og tulo ang imong luha sa matag higayon nga imong madungog ang gozos.  Milagro nga matawag nga bisan man lang sa ika-usa sa matag tuig, imong mapamatud-an sa kaugalingon nga wa’y dakong pagsuway o bug-at nga problema ang makatay-og sa pagtuo ug debosyon ngadto sa balaang bata.  Milagro nga nagduda ka sa unahan apan napamatud-ang sayop ka sa imong gikabalak-an sa kauwahian.  Ug kana maoy akong kasinatian sa milagrosong bata.

Email: [email protected] or [email protected]