^

PSN Opinyon

Mga pangus sa Sinulog

KUMBATI - Rico Lucena - The Philippine Star

Karong adlawa, nagsugod na ang nobenaryo alang sa kapiyestahan ni Senyor Sto. Niño.  Daghang mga kalihukan ang sugod nang gibuksan ning semanaha hangtud na sunod semanaha atol sa piyesta senyor.  Apan sa di’ pa sugdan ug saulogon ang labing mahinungdanon nga okasyon sa Sugbo, angayan nga tan-awon ang pipila ka mga pangus nga naangkon sa maong kasaulogan su’d sa dugay nang katuigan.  Sama sa ubang mga kasaulogan, di’ hapsay o malinawon ang kasaysayan sa labing grandyosong festival sa nasud.  Sa pagsugod sa mga adlaw paingon sa Sinulog, adunay mga butang nga nagpabiling dakong kwestyon kung na unsa na o nasulbad ba?

Unsa nay update sa kawat nga nahitabo su’d sa buhatan sa Sinulog foundation?  Nikabat sa 1.6 milyones ka pesos ang kantidad nga nakuha sa mga wa’ pa masikop nga mga kawatan.  Sa kaadunahan sa grupo nga maoy tig-muntar sa Sinulog, makapahibo’ng nganong wa’ gyud makabutang og maayong seguridad sa mismong buhatan sa Sinulog foundation.  Kutob na lang sa pagduda ang tanan nga adunay inside job nga nahitabo.  Apan tinuod man o dili, usa lang ang seguridad, minilyon ka pesos nga salapi ang wa’ pa mauli sa foundation ug wa’ pay mga tawo nga gisilotan tungod sa maong insidente.  Ang tataw lang mao nga alang sa premyo ug bayad sa mga tawo nga nagtrabaho alang sa Sinulog ang nalisan dihang nahitabo ang krimen magduha ka tuig na karon.

Nakahinumdum pa ba ‘ta sa Sinulog Festival upat ka tuig na ang nakalabay dihang nireklamo ang mismong giilang tigpasi-ugda sa maong okasyon, David Odilao nga wa’ siya gitratar pagmaayo atol sa Sinulog festival nga iyang gipasiugdahan niadtong 1980’s.  Daghan ang nisimpatiya ni Odilao kaniadto tungod kay daw wa’ mahatagi og importansya ang tawo nga maoy naghatag og konsepto ug nagsugod sa karon labing grandyoso nga okasyon sa nasud.  Gisugdan ni Odilao ang Sinulog nga parade pinaagi sa pagtigum sa mga tunghaan sa dakbayan sa Sugbo aron sugdan ang kultural nga aspeto sa kapiyestahan sa batang Hesus.  Wa’ magtuo si Odilao nga mamahimong usa ka dakong kasaulogan ang festival.   Kasaulogan nga sa kauwahian, maoy ni-snob niya ug wa’ maghatag og importansya sa iyang presensya.

Dakong kwestyon kung nahasubay pa sa tinuod nga tumong ang Sinulog festival—ang pag-aghat ug pagpahibawo sa kalibutan kabahin sa debosyon sa balaang bata.  Samtang nagkadugay, mas gitutokan pa sa mga organizer ang komersyalismo sa kasaulogan.  Di’  mapapas ang mga pagsaway sama sa mahal nga ticket atol sa grand parade nga karong tuiga, nikabat na sa halos tres mil pesos  depende sa dapit nga lingkuran.  Gipasalig sa Sinulog foundation nga mopaingon sa mga biktima sa bagyong Yolanda ang pipila ka bahin sa ticket sale.  Ang kwestyon karon, pila man ang mopaingon sa mga biktima sa katalagman?  Unsa ba ka luwas sa kamot sa mga organizer ang salapi human nagpabiling dakong kwestyon kinsa ang nagkawat sa P1.6 million sa mga miaging tuig?  Aduna pa bay pagsalig ang mga tawo sa palpak nga nahimo sa grupo?

Sa paglabay sa panahon, makapangutana ‘ta kung tukma pa ba ang gihimo sa mga tawo nga nagpaluyo sa Sinulog.  Mas daghan ang panga’n sa mga produkto nga imong makita sa kadalanan inay sa mga imahen ni Senyor Santo Niño.  Mas daghan ang mga  tawo nga mosalmot sa kalihukan sa kadalanan inay sa mga tawo nga magtapok sa Basilica del Sto. Niño.  Mas daghan ang kalihukan nga kultural gikan sa Sinulog sa kabataan hangtud na sa grand parade atol sa Sinulog festival itandi sa mga kalihukang reliyoso.  Hinuon wa’ pay makasulti kung asa ang mas daghan og masapi, ang simbahan ba o ang Sinulog foundation.  Usa lang ang tataw sa pagkakaron, mokita ang mga negosyante nga parehong naninda og mga souvenir items ug mga imahen sa balaang bata.

Email: [email protected]. or [email protected].

APAN

DAVID ODILAO

ODILAO

SENYOR SANTO NI

SINULOG

  • Latest
  • Trending
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with