Brgy Ocoy, Sta Fe, Cebu

Daghan kaayo ang mga reklamo nga akong nadawat bahin aning mga kalaki sa ubang mga kapitan sa barangay ug sa ilang mga sinaligan kay giingong gipamolitika pilion ra ang mga hatagan og hinabang niadtong mga nabiktima sa bagyong Yolanda. Naa say uban nga kapitan nga dili hatagan kadtong mga biktima nga ilang mailhan nga  dunay mga anak nga naay trabaho sa siyudad dili hatagan nga unta ang hinabang para man sa tanang biktima sa bagyo. Unya kun buot hunahunaon dili man gikan sa ilang bulsa ang hinabang gikan man unta ni sa mga tawo dunay malumong kasingkasing nga nakakita sa situwasyon sa tanang mga biktima ug dili sa pipila lang.

BRGY OCOY, STA FE, CEBU

“Tabangi intawon mi sir Jun kay diri sa among lugar klaro man kaayo gipamolitika ang pagpanghatag sa hinabang kay pilion ra man ang supporter sa mayor unya kaming kontra partido wala man hatagi labi na sa mga housing materials.”

BRGY HILUTONGAN, BANTAYAN, CEBU

“Ipasusi tawon na diri sa Bantayan kay kaming mga gagmay nga mga isla wala kaayo matagad sa mga hinabang gikan sa munisipyo luoy kaayo mga biktima diri sa bagyo.”

BRGY BAIGAD, BANTAYAN, CEBU

“Sir Jun diri among baryo wala na gyud mahatagi’g hinabang gikan sa munisipyo pero sa among silingan nga baryo sige lang sila’g kadawat, hangyo unta mi sa mayor nga mahatagan na sad mi diri hinabang.”

BRGY MAYA, DAAN-BANTAYAN, CEBU

“Naunsa man tawon ning pagpanghatag og cash assistance gikan sa DSWD nga tag 2,600 pesos nga gipaagi man sa konsehal sa barangay kay gipili ra man ang gilista daghang mga biktima ang wa kadawat.”

BRGY TICAD, BANTAYAN, CEBU

“Diri sa amo sa sitio Tangke naay gipanghatag nga sin gikan daw sa foundation sa mga Layese pero ang gisugo pagpanglista kay gipili ra man ang gilista daghan ang nagyawyaw diri kay wala mahatagi.”

BRGY KANGKAIBE, BANTAYAN, CEBU

“Naunsa man tawon ni amo kapitan diri nga gipili ra man ang mga gihatagan sa mga hinabang gikan sa red cross wala gyud kadawat ang dili mauyonan sa among lider sa barangay.”

BRGY POBLACION, SAN REMEGIO, CEBU

“Naay mga hinabang nga nangabot diri sa lungsod daghan kaayo pero ang among gikahibudngan kay wala man gyu’y naabot nga hinabang ngadto sa mga tawo napuno na tawon ang munisipyo sa mga relief goods.”

BRGY LAKARON, SAN FERNANDO, CEBU

“Nagkagrabe na man ang shabu diri sa lungsod Sir labi na sa among barangay wala gyud ni masulbad kay naa daw mga opisyal nga nagpaluyo aning mga pusher diri mao ladlad kaayo ang pamaligya diri.”

BRGY GUIWANON, COMPOSTELA, CEBU

“Diri gyud sa eskina sa among baryo Sir kay naghitak man ang shabu unya daghan na  sab mga video karrera ang akong bana nabuang na gyod ani nga mga bisyo mao gusto ko masumpo na ning problemaha.”

Alang sa inyong mga reklamo 09163869202