Husto ang gihimo ni Napoles

Ang pagsurender ni Janet Napoles sa Malakanyang matawag nga usa ka hustong lakang. Maayo ang iyang gihimo kay sa magtagotago siya ug adunay patong ang iyang ulo nga minilyon kun kinsa ang makatudlo kun asa ug hain siya.

Demokrasya ang nasud nga Pilipinas. Adunay igong panahon si Napoles nga malimpiyohan ang iyang ngalan pinaagi sa due process. Gawas niini, masayran usab sa mga Pilipino kun kinsa ang atong mga magbabalaod nga adunay tulubagon sa dakong kasaypanan sa pork barrel.

Adunay laing rason nga maayo ang desisyon ni Napoles sa pagsurender. Ug kini mao ang seguridad sa iyang kinabuhi. Dili siya makaseguro sa iyang kaluwasan tungod sa mga dagkong tawo nga gilambigit kaniya nga kauban niya sa giingong pagpangawkaw sa kuwarta sa gobyerno ug sa katawhang Pilipino.

Kahinumdoman nga si Napoles maoy giingon nga utok o mastermind sa binilyong pork barrel scam. Siya kuno ang nagpasiugda sa mini nga NGO (Non-Government Organization) diin adunay mga senador ug mga kongresista nga nagbutang og minilyon nga kuwarta isip pundo sa maong NGO.

Angayan lang nga ibulgar ni Napoles  kining maong mga magbalalaod sa atong nasud aron himuong panaminan sa uban na natong magbabalaod sa kongreso. Kining giingon nga eskandalo sa pork barrel sa pipila nato ka senador ug kongresista nakapasamot sa kangil-ad sa panan-aw sa ubang nasud sa Pilipinas.

Pastilan, ang atong mga magbabalaod nahilambigit sa eskandalo sa pork barrel? Ang mga Pilipino angayan lang nga masayod kun kinsa kining mga tawhana nga naghatag og dakong mansa sa Pilipinas. Kataw-an kita sa ubang nasud kay ang atong tigbuhat og balaod mismo ang nakahimo og dagkong kasaypanan sa ilang katungdanan.

Anaa kang Napoles ang paglimpiyo dili lamang sa iyang ngalan, kondili sa tibuok nasud nga Pilipinhon pinaagi sa pagbulgar sa mga tawo nga nahiapil sa giingong pagpangawat sa kaban sa nasud.