Bag-angan gihapon ang mga buaya sa BOC

Tulo ka mga kawani sa Bureau of Customs nga nadistino sa x-Ray division ang garapalan nga nangayo og tag 25 mil ka pesos sa matag container vans nga adunay sulod nga mga kargamento. Sa ilang gihimo lupig pa nila ang mga kawani sa Assessment Division nga maoy gitahasan sa balaud sa paghimo og mga valuation sa mga imported nga mga kargamento.

Sigun sa balaud ang Assessment Division lamang sa Bureau of Customs ang adunay gahom sa paghimo og valuation sa tanang mga imported nga mga kargamento pero nag apil-apil na niini ang X-ray division nga ang trabaho mao ra unta ang pagbantay ug sa pagsuta sa mga kargamento nga anaa sulod sa mga container vans.

Tungod kay maayo ang ilang panapi, luho na ang kinabuhi sa tulo ka mga kawani sa X-ray division ug karon inyong makita ang bag-o nilang mga sakyanan ug bonggang night life. Labing seguro mao kini ang hinungdan kun nganong naghimo na gyod sila mismo og ilang kaugalingong valuation team kansang assessment mao na ang ilang sundon ug dili ang assessment sa mga appraisers ug examiners sa Assessment Division para tuloy ang ligaya nilang mga bag-angang buaya. Gumikan sa ilang gihimo duha na karon ang Assessment Division sa Bureau of Customs sa Port of Cebu nga maoy naproblemahan sa mga importers kay duha na upod ang ilang bayranan nga tariff ug customs duties.

Aron dili mo masaag sa inyong pagsabot hatagan ko kamo sa kalainan sa duha ka Assessment Division karon diha sa Bureau of Customs. Sa duha ka Assessment Division ang usa lehitimo samtang ang ikaduha dili, himo-himo lang o peke. Kun tinambanon nato o kun atong binisay-on, ang lehitimo nga assessment bayranan samtang ang ikaduha o himo-himo nga assessment tukbononon sa mga buaya nga nagnganga nga nagluko sa X-ray division sa Bureau of Customs sa Port of Cebu.

Kining maong panapi sa mga kawani sa X-Ray division nakaabot na sa buhatan ni Customs Commissioner Rufino Biazon pero hangtod karon wala pa siya’y gihimo niini. Ngano kaha? Nakauyon ra siya sa gihimo sa iyang mga tawo?   

* * *

Sa laing bahin, subo ang nahitabo sa duha ka mga biktima sa vehicular accident niadtong Lunes sa kaadlawon sa may dalan V. Rama, dakbayan sa Sugbo. Ang mga biktima nagsakay og motorsiklo dihang misaliring kini nga miresulta sa ilang pagkatomba. Sa ilang pagkatomba usa ka tawo ang miduol kanila apan inay kay sila ang tabangan sa pagpabarog ang motorsiklo hinuon nila ang gipabarog, gipaandar ug gipadagan. Sa laktod, taliwala sa ilang kahimtang, inay kay tabangan ug dadon sa tambalanan, sila gikawatan. Pagkasalbahis sa naghimo sa ingon.