Papason ang SK eleksiyon sa mga batan-on

Nagkadaiya karon ang gipadayag nga baroganan sa katawhan labot sa  isyu kun angay pa nga magpadayon sa pagsalmot sa election ang Sangguniang Kabataan (SK) dinhi sa nasud nga madungan usab sa piniliay sa mga barangay opisyal.

Adunay nagpadayag sa ilang baroganan nga angay lamang kining papason, adunay nagsuporta sa pagpadayon ug adunay nag-ingon nga ipadayon apan kinahanglan nga hapsayon lamang ang pagpadagan.

Sa mga mipadayag sa pagpapas sa SK dinhi sa nasud maoy ilang gipasabot nga mohaum sa maayong katuyoan sa kagamhanan sa mga batan-on nga makapanginlabot sa pagpadagan sa kagamhanan sa kabarangayan dinhi sa nasud.

Dugang pa nila nga nagpalambo na hinuon kini sa daynastiya dinhi sa nasud kay  kadaghanan nga nahimong SK sa kabarangayan mao man kadtong mga anak sa mga inilang politiko sa ilang lugar.

Ang lain nilang panahom sa mga mipadayag og pagsupak mao nga ang SK nahimo na nga training ground sa mga batan-on ngadto sa pagkahimong banggiitang politiko nga ubos sa linghod niining kaisipan nahashas na daan sa mga pamaagi unsaon sa pagpamintaha nga maoy gigamit ang gihuptan niining gahom.

Hinuon ang mga nagsuporta sa pagpadayon sa SK maoy ilang gipasabot nga angay gayod kining ipadayon sanglit naghatag man kini og dakong kahigayonan sa mga batan-on sa kabarangayan nga makapasiugda usab og mga programa ang kagamhanan nga gipahaum sa ilang panginahanglan.