EDITORIAL - Kaisug sa militar gipakita na

Daghang nalipay  dihang gipagawas  sa hepe  sa mga sundawo sa nasud nga mosukol kini’g  pinatyanay  aron  pagpanalipod sa teritoryo sa Pilipinas ilabi na  ang  mga  isla  sa Spratly  nga  giibid-ibiran  sa  mga  sundawo  sa Insek  kay  buot  nilang  ilogon.

Dugay naman  nga  nga-ukoy-ukoy ang  mga  Insek  nga  ilugon  nila  ang  mga  isla  sa Spratly  sa  pagtuo  nila  nga  bahag  kaayo  ang  ikog  sa  mga  sundawong  Filipino  nga  gipabantay  sa gobiyerno  sa Pilipinas  didto. Karong  nakita  na  nila  nga misukol na  ang  mga  Filipino dihang  dasmagan  unta  sa barkong Taiwanese  ang  gamay’ng  barko  sa coast guard  ug  namatyan  og  usa  ang  Taiwanese, nakaingon  sila  nga “mosukol  diay ang Pinoy”.

Tinuod  deklarado  na  ang  hepe  sa mga sundawo  nga  suklan  nila  bisan  kinsang nasud  nga  mosuway  pagpanamastamas  sa katigayonang  Pilipinhon nga anaa  sa kadagatan  nga  sakop  sa teritoryo  niini, ug  andam  nilang ibuhis  ang  ilang  kinabuhi hangtud  sa katapusang  sundawo.

Aw, mao  gyud, kay  kita dinhi  sa ato, gumikan  kay  way  mga  taga  laing  nasud  nga  nangataki, mag-unay  na lang  og pinatyanay.

Sama  sa  mga  rebelding NPA ug  Muslim   nga  mga  Filipino  ra usab makig-unay  og  patay  sa  mga  sundawo  sa   kagamhanan.

Bisan  ang  mga  sibilyan  unayon  ra nila  sa pag-ihaw  tungod  sa ilang kaisug  kay  way  laing kapahungawan.

Gani  mas  maayo  man  untang  kining  mga  rebeldiha, isug  man  gyud  ni  sila mao unta  kini  idestino  didto  sa Spratly  tan-awon  nato  kun di  ba  m obahag  ang  ilang  ikog  kun  moarangkada na  ang  mga  Insek pag-ilog  sa  mga  isla  sa Pilipinas  didto.

 Kining  mga tulisan  dinhi  ug  uban pang  kriminal  nga  kusog  kaayo  manaugdaog  sa ilang  isigkaingon  nga  mga Filipino, maayo untang  mao  kini  ilawog  didto  sa panggubatan atong tan-awon  asa  kutob  ang  ilang  kaisug. Makatarunganon  lang  nga  ang kaisog  sa  mga  Filipino  ipakita  na  karong panahona kay  maingon  nato  nga  nahurot  na ang  atong  talaw  niadtong  panahon  sa mga  Katsila ug  mga  Hapon.

 Ang maong  mga langyaw  nga  midominar  sa Pilipinas  nakapatay  og  linibo  ka  mga Filipino  pinaagi  sa ilang  mga  kamot  nga  madagmalon  kaayo  kay  nakita  nila  ang  mga  Filipino  kaniadto  nga talawan  ra kaayo  gawas  sa pipila  nga  misukol  kanila. Sa  kamot  sa maong  mga langyaw  nangamatay  ang  daghan natong  mga  ginikanan  nga gilaplapan  sa lapa-lapa  ug gipalakaw-lakaw  sa asinan, ang uban namatay  sa lapdos  sa bunal  nga  ikog  sa pagi,  ang  uban  gipatay  pinaagi  sa paggaid  sa bay  sa hulmigas  ug  labaw  sa tanan  daghan  kaayong  gituhog  sa ilang bayonita  ug  gipalapsan  sa ilang  mga  bala.

  Ug karon mao lang gihapon?