Atimana ang panglawas

Kinanghanglan g’yud diay nga matag karon ug unya ipahiling nato ang atong lawas sa doktor pinaagi usab sa pag-undergo og laboratory examinations.

Gikan niadtong Lunes mi-undergo ko og blood-related laboratory tests ug kay nakabantay man ang doktor nga dunay angay’ng hatagan og diha-diha nga pag-atiman, gi-refer ko og laing doktor.

Dili lang nako idetalyi pag-ayo ang resulta sa akong examination apan awhag nako sa uban nga kinahanglan gayud nga mahiling ang inyong lawas kay aron matambalan.

Nahinumdom ko sa akong higala nga si Marlon Bellita nga reporter/anchor sa usa ka radio station nga nahibaw-an na lang namo nga didto na gi-admit sa ospital.

Busa kamo diha, ilabi na og pwera buyag tambok ang inyong lawas, siguroa nga makapahiling mo sa doktor.

Napasagdan man gud nako ang akong lawas kay repeat check up unta nako niadtong Pebrero apan tungod sa ka-busy sa election period, karon na ako nakapa-checkup og balik.

* * *

Nakadayeg ko sa baruganan sa mga opisyal nga alyado sa Bando Osmeña Pundok-Kauswagan (BOPK) nga mitataw nga dili gayud sila moambak sa laing grupo.

Nindot man gud nga ang mga konsehal sakop sa duha ka pundok kay masuta gayud kun husto ba ang gihimo sa administrasyon.

Duna man go’y reporter nga mitug-an nga nakadungog kuno siya nga usa sa mga BOPK nga konsehal miingon nga kun mahimo pa lang buksan ang iyang dughan, makita g’yud nga siya Team Rama.

Ambot dili ba kaha ‘sab intriga ang maong pamahayag aron lang pagguba sa BOPK.

* * *

Nakadungog ‘sab ko og pamahayag sa usa ka supporter sa BOPK nga si Mayor Michael Rama ila kuno nga ipa-recall sa iyang pagka mayor.

Mora’g wala kaayo masayud sa balaud ang maong tawo nga napaminawan nako didto sa klinika nga akong gisudlan mao nga ako nga tin-awon ang maong isyu.

Ang gitawag og “recall elections” gitumong aron sa pagtangtang sa usa ka opisyal sa kagamhanan nga pinili sa katawhan.  Gitugot kini sa balaud ang maong lakang apan timan-i, dili kini mahimo sulod sa unang usa ka tuig ingon man sa katapusang tuig sa termino sa usa ka opisyal.

Sa ato pa, adto ra ang recall elections mahimo sa ikaduha ka tuig sa termino sa opisyal.

Ang recall elections mahimong iduso sa mga barangay kapitan nga pagatawgon og Preparatory Recall Assembly o sa petisyon sa 25 porsiento sa mga botante sa mao nga dapit.

Kataw-onon kaayo nga naminaw sa usa ka tawo nga nagbuwa lang ang ba-ba apan ang iyang gihatag nga inpormasyon sayop.