EDITORYAL - Linabayay og Lapok

Basta eleksyon, daghan nang manggawas nga mga baho o akusasyon batok sa mga kandidato. Mao gyud kini tingsiaw sa kaabtik sa mga politiko batok sa ilang mga kontra.

Sa yanong pagka-estorya mao kini ang gitawag kaniadto pa nga ‘linabayay og lapok.’

Ang makapahibulong lang kay anhi lang ni manggawas kun panahon na sa eleksyon. Nganong sa wala pa ang bugnong lugaynon menus man kaayo sa kaabtik kining mga tawo nga nagbantay sa lihok sa mga naa sa pangatungdanan?

Tataw kaayo nga dunay risgo sa paghimo niini sa habig sa mipasaka og mga kaso apan sa ngalan daw sa ‘ligdong’ ug matinud-anong panerbisyo publiko ilaha kining sakripisyo.

Bisan unsa pay pangangkon sa mga politiko sa rason sa pagsang-at sa mga kaso, reklamo ug akusasyon maisip gyud kining personal nilang interes maoy ilang giapas aron dauton ilang mga kaatbang.

Apan bisan pa man sa nagtipun-og nga mga kaso, pirme gihapong modaog kining mga gipang-pasanginlang kurakot, abusado, tapulan nga mga politiko.

Usa sa dako og papel ug matawag nga sad-an mao ang mga botanteng wala magpakabana sa ilang palibot ug anha lang moaktibo panahon sa eleksyon nga diin dunay ‘dawaton’ gikan sa mga kandidato, tarong man o kurakot.

Sa laktod nga pagkaestorya way pagkatagam ang mga botante ug way leksyon nga nakat-unan gikan niining mga kasoha.