EDITORIAL - Usikan sa pagkaong humay isipong kriminal?

Kini kun may magbabalaod nga   modaginot ning isyuha, pag-isip  nga  kriminal  sa tawo, (mabata man  o  mahamtong) nga  usikan  sa kan-on   nga  anaa  na sa iyang plato o sa kaldero, aw  daghan  gyung mapriso.

Kana  kun  ang  tanang  magbabalaod  may respeto  sa pagkaon   nga  bisan  usa  ka  lugas humay malinugaw man o  bantok  nga  pagkaluto nga  anaa  sa iyang  plato, daginuton  gyud  agi og  pagtahud  sa nagbuhat  sa  humay  nga mao  ang Dios  nga  makagagahum  sa tanan ug  nagbuhat  sa tanang  mga  butang  sa kalibotan.

Kay  kun mayoridad  sa  mga  magbabalaod usikan  kaayo, kanang  biyaan  lang  sa iyang  plato  ang  kan-on,   tungod  ba  kaha  kay  bisan  busog  na  kaayo  gikargahan  pa  ang  iyang  plato  og  daghang  kan-on  busa  di  na  makahurot  ug gusto  nalang  kining isalibay, aw  di gyud  mosaler  ang  pagbalaod nga  isipong kriminal   ang  usikan  sa kan-on.

Ang nagsugyot  nga  isipong kriminal  ang  usikan  sa kan-on mao si Yuan Longping, usa ka Chinese Professor nga  maoy  nagdiskubre  sa hybrid rice.

Nasuta nga matag tuig mokabat sa P6.2 bilyones ang  balor  sa kan-on  nga  humay  nga mausik  sa nasud  ug  matag  usa  ka Filipino molabay  og  tagduha  ka  kutsara  nga  kan-ong  humay  matag  adlaw.

Sa kadako  diay  sa kantidad  sa isalibay  nga  pagkaon  angay  baya tuod  nga  disiplinahon  ang  matag  tawo  nga  wa makaila  sa kamahinungdanon  sa pagkaon.

Una  sa tanan  ang  humay  maoy  numero unong  pantubil  sa lawas  sa tawo  aron  mabuhi  ug molahutay  og  dugay  busa  angay  kining ampingan  ug  mahalon  sa matag  Filipino.

Ikaduha, way tawong  makagama  og  humay  kun may  nadiskubre  man  ang  mga  scientist  nga  hybrid  rice,   mugna  lang  kini   sa ilang  eksperimento  apan  ang  tanan gikan  sa orihinal  nga  gama  sa Dios. Kasagaran  sa  mga  Filipino ilabi na  sa mga  pobre, moatubang  sa plato  nga imbis  magpasalamat  sa Dios, manguros  na hinuon nga  suma  pa  sa libro  sa pari  ang  pagpanguros  maoy  pag-abog sa yawa.

Buot bang ipasabot nga  giyak-an  sa yawa  ang  pagkaon busa angay  siyang  abugon?Nganong  di man  litukon  sa  baba  ug  dila  sa tawo  ang  iyang  pagpasalamat  sa Dios, kun nasayud  siya nga  Dios  maoy   naghimo sa iyang pagkaon?  Unya mobiya  sa plato nga  di hutdon  ang  kan-on,  nga mas maayo pa  ang iro  kay bisan  katapusang  mumho tilapan pa.