EDITORIAL - Katoliko magpadayon sa iyang paglipang

Taliwa  sa kaguliyang  nga nahitabo sa Vatican  gumikan  sa pag-resign ni Pope Benedict XVI  human mohungaw  ang  nagkalainlaing  anomaliya  sa  mga  Cardinal  sa sud ug sa gawas  sa Vatican, magpadayon  sa paglig-on  ang  maong  relihiyon  kansang  mga membro  niini  misaad  nga  anhi  na  magpakamatay.

Ang  paglipang  niini  karon  sa  gidaghanon  nga 1.2 bilyones, hayan  modoble  pa  kini  pipila ka tuig  gikan  karon. Sa Biblia way tagna  nga  mabungkag  pa  kining  relihiyona  bisan  tuod  may  nakasulat  sa maong  libro  nga  may  kuhaon  ang  Dios  gikan  niini  nga Iyang gipili o pilion pa aron ibutang  sa Iyang  kaugalingong  pundok, apan  di  kini  makatipsing  sa kakusog  sa pagtubo  sa Katoliko  ug  ang  hilabihang  kalig-on  niini.

Sa Biblia  may  gipahibawo  ang  Dios  nga  hagip-ot  kaayo  ang  dan  nga maghatud  sa tawo  sa kaluwasan, ug diriyot  ra  ang  nakatultol niini, samtang  lapad ug luag  kaayo  ang dan  nga maghatud  sa tawo  sa kalaglagan  sa pag-abot  sa  adlaw  sa paghukom.

Sa pagkakaron padayon  pa ang 115 ka  mga  Cardinal  sa pagsabot-sabot  pinaagi  sa gitawag  nila  nga  conclave  bahin  sa  kwalipikasyon  sa itudlo  nga  Sto. Papa  hulip  sa  mi-resign  nga si Pope Benedict XVI.

May  lima  ka  Cardinal  nga  gitugpo   o  ginominar na  nga  papilian  sa  mopuli  paglingkod  nga Sto. Papa  ug  wa mahilakip  niini  si Cardinal  Tagle  sa Pilipinas  ang paborito  unta  sa mga Filipino.

Ang gusto  sa mayoridad  nga membro  sa Katoliko  nga  mas  batan-on og dyutay  ang  himoong  Sto. Papa  aron taas  kini  og lanat  sa pangatungdanan  nga  di  kapasanginlan  ang  panglawas  ug  ang pangisip.

Kay  ang  batan-on   og  dyutay  itandi  sa tagkaping 80 na  nga edad, mas kusog  pa kini  moarangkada  sa paghimo  og  mga desisyon aron labing  mabantayan  ang  kahimsog  sa tanang  membro  sa Katoliko  sa tibuok  kalibotan nga nagpaabot  usab  sa  pagbalik  ni  Kristo.

Kini aron  sa hingpit  makalimtan  ang  mga  giyagyag  nga sekreto  sa  ubang  mga  Cardinal  sa sud ug sa gawas  sa Vatican  gikan  sa korapsyon  ug  uban pang  nagkadaiyang  eskandalo nga  gibutyag  sa usa ka libro  nga  gikawat  sa sinaligan   ni Pope Benedict XVI kinsa mitunol niini   ngadto  sa usa  ka mediaman nga  maoy mipahungaw  niini  ngadto  sa katawhan  nga  maoy  hinungdan  sa paglumoy ug  pagkaluya   ni Pope Benedict XVI  nga  misangpot  sa iyang  pag-resign  sa  katungdanan.