Bata nga gisagop, maka-inherit pa ba sa iyang biological father?

Ang biological parents sa bata mawad-an og parental authority kun ang iyang anak gisagop na sa laing pamilya. Ang bata nga gisagop gikonsiderar na sa atong balaod nga legitimate nga anak sa mga nagsagop kaniya busa mamahimo na siyang maka-inherit kanila. Apan ang pangutana kun aduna pa bay katungod ang bata nga gisagop na sa pag-inherit sa kabtangan sa iyang biological father? Kana nga pangutana ang atong tubagon karon sa atong column.

* * *

Dear Atty. Divine,

Aduna koy illegitimate child kon anak sa akong pagkadalaga nga gi-adopt nako ug sa akong bana karon. Usa ka negosyante ang biological father sa akong anak apan wa mi magkadayon kay naminyo siya og lain. Ang gigamit nga apelyido karon sa akong  anak mao na ang apelyido sa akong bana. Masakiton na ang biological father sa akong anak atty. ug ang akong pangutana atty kun ugaling mamatay ang biological father sa akong anak, mamahimo pa ba siyang maka-inherit sa kabilin sa iyang amahan nga gisagop na man siya legally nako ug sa akong bana? —Claire,

* * *

Dear Claire,

Ang imong pagsagop sa imong illegitimate nga anak uban sa imong bana nakapausab sa iyang status gikan sa illegitimate ngadto na sa legitimate. Ang parental authority sa maong bata nabalhin na ngadto kaninyong duha sa imong bana ug wa nay parental authority niini ang iyang biological father. Tungod sa iyang pagkahimong legitimate nga anak, mamahimo na siyang maka-inherit kanimo ug sa kabtangan sa imong bana. Apan bisan kun wa nay parental authority ang biological father sa bata, mamahimo gihapon siyang maka-inherit sa kabtangan sa iyang biological father basi sa  Article 189 (3) sa atong Family Code nga nagkanayon: “The adopted shall remain an intestate heir of his parents and other blood relatives.” Sa ato pa, kun ang biological father sa imong anak mamatay nga way Last Will and Testament, ang iyang anak bisan kun gisagop na kini mamahimo gihapon nga maka-inherit kaniya  ug sa lain niyang mga kadugo. Hinaut nga akong natubag ang imong pangutana. — Atty. Divine

* * *

Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected]