Sa canonization ni Blessed Pedro Calungsod

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Daghan ang nagtinguha sa pag-adto sa Vatican alang sa pagtambong sa canonization ni Blessed Pedro Calungsod nga gikatakda karong Oktubre 21 niining tuiga.

Gibutyag kini ni Cebu Archbishop Jose Palma human magpadala og sulat ngadto kaniya ang Italian embassy sa Manila nga nagpahinumdom sa mokabat 3,000 ka mga endorsement alang sa pagkuha og visa sa tumong nga makatambong usab kini alang sa canonization ni Calungsod.

Dili ikalimod nga ang kadaghanan sa nagtinguha sa pagtambong sa canonization ni Blessed Calungsod mao kadtong mga arang-arang og kahimtang nga sakop sa pamilya nga mga relihiyosong Katoliko nga makasugakod sa galastohan sa pagkuha og visa ug sa galastohan sa ilang pagbiyahe.

Matud pa nila nga ang mga ordinaryo nga mga rilihiyosong Katoliko nga walay salapi nga ikagasto sa pagkuha og visa ug ingon sa galastohan sa pagbiyahe nga magtapok lamang sa mga dapit nga ipahiluna sa atong mga Obispo ug kaparian.

Dugang pa nila nga sa mga nagtinguha alang sa pagtambong sa canonization ni Calungsod karong Oktobre 21 niining tuiga dili gayod magpaiwit ang mga Sugboanon.

Gitataw nila nga si Calungsod nga maoy labing unang Sugboanon nga mahimong Santos dili usab ikalimod nga daghan usab ang mangangkon nga paryente nga madasigon usab unta sa pagtambong.

Adunay mga Calungsod sa lainlaing dapit sa Kabisay-an ug Mindanao nga gituohan usab nga iyang mga kabanay nga maikagon usab unta sa pagtambong sa iyang canonization sa Vatican.

Ang nahimong suliran ang galastohan alang sa pagbiyahe ngadto sa maong lugar ug gipaabot nga anhi kini sa Sugbo magambahan sa pagsaksi sa pasiugdahan nga mga kalihokan sa atong kaparian atol sa maong adlaw. (Romeo T. Limpangog)