Gubot pa sa lukot ang politika

Matud pa nila nga ang lukot usa ka matang nga kalan-on sa dagat nga naggikan sa biya sa dagko nga mga isda. Gubot ang iyang kahimtang ug lisod gayod ang paghapsay kay lisod man ang pagsubay.

Mao kini ang ilang gipanag-ingnan sa politika dinhi sa nasud nga nagsugod na sa pagbukal ug matataw na kaayo sa mga lihok sa pipila ka mga politiko nga padayon na sa pagpalig-on sa ilang gisakopan nga mga partido sa pagsiguro sa ilang kadaugan sa umaabot nga piniliay.

Daghan ang nag-ingon nga sa matag piniliay nga pagahimoon dili gayod kalikayan nga adunay maepektohan nga serbisyo nga gikinahanglan tungod kay mosangko man kini sa dili na pagsinabtanay.

Matud pa nila nga kun ang atong mga politiko nga naglingkod sa katungdanan nga gipili sa mayoriyang katawhan sa panahon sa piniliay sa ilang pagpasubli sa katungdanan dili gayod kalikayan nga mosangko sa kakulian sa pagtuman sa ilang mga kaakohan.

Gipadayag nila nga kining maong kahimtang sagad masinati kun ang atong mga politiko nga mga opisyal nga naghupot sa renda sa pangagamhanan maoy ipatigbabaw ang kaugalingong kaayohan ug mahiklin na hinuon ang tinud-anay nga pagtuman sa ilang kaakohan nga gipanumpaan sa katawhan.

Dugang pa nila nga ang nakapait nga palandungon kay kun ang atong mga politiko nga naglingkod sa katungdanan anaa na magsubay sa managkalahi nga dalan maoy mapiit ang katawhan nga ilang gialagaran.

Gipasabot nila nga dili gayod ikalimod nga sa panagbulag og dalan sa matag piniling opisyal ang ilang mga dumadapig lakip usab sa magkabulag ug mosangko pa gani sa panagbungol ug dili magtinagdanay kay lainlain man ang politiko nga ilang gilabanan.

Adunay managsuon o suod nga managhigala nga nagkalahi ang politiko nga gilabanan sa panahon sa piliay nga wala na gayod magtinagdanay ug makalibog kun unsaon paghusay. “Gubot pa sa lukot!!!.