Ang binuang sa RTWPB

Karong adlawa mao ang adlaw sa mga anak sa singot. Kay iyang adlaw nagpaabot siya nga adunay moabot nga inadlawan apan wala. Busa nagminghoy niining adlawa ang mga anak sa singot dinhi sa tunga-tungang Visayas. Nagminghoy niining adlawa ang mga anak sa singot tungod kay gibinuangan sa mga sakop sa Regional Tripartite Wages and Productivity Board 7.

Kay wala kuno kaayo maapektohi sa mga pagsaka sa prisyo sa mga nag-unang palaliton ug pletihan, dili angayan nga hatagan og dugang umento sa ilang suholan ang mga anak sa singot dinhi sa tunga-tungang Visayas. Kay walay nakitang supervening event nga makahatag og rason alang sa dugang umento sa suholan, gihatagan og zero o itlog sa RTWPB ang mga anak sa singot nga mga taga tunga-tungang Visayas.

Samtang ang mga taga tunga-tungang Visayas walay madawat nga inadlawan gikan sa RTWPB, ang mga taga laing rehiyon aduna. Unsa man diay kalainan sa mga taga tunga-tungang Visayas ug sa mga taga laing rehiyon nga gihatagan man sila didto og dugang umento sa suholan samtang kita dinhi wala? Buot bang ipasabot nga mas dato ang mga anak sa singot sa tunga-tungang Visayas kay sa mga taga laing rehiyon? Kun nakakita sa supervening event nga makahatag og rason alang sa dugang umento sa suholan ang RTWPB sa mga laing rehiyon sa nasud, nganong wala man makakita ang mga sakop sa RTWPB dinhi sa tunga-tungang Visayas? Buot bang ipasabot niini nga ang mga sakop sa RTWPB 7 dili makamao mangita o mga bota kay wala makakita?

Kinsa man nga anak sa singot ang gipangutana sa mga sakop sa Regional Tripartite Wages and Productivity Board ang miingon nga wala sila maapektohi kaayo sa pagsaka sa prisyo sa mga nag-unang palaliton ug pletihan? Mga tinuod kaha silang tawo o tawo-tawo lamang. Tuod, ang mga sakop sa RTWPB 7 ania kaha ni sila magpuyo sa tunga-tungang Visayas? Wala kaha ni sila magpuyo didto sa buwan? Wala man ugod ni sila masayod sa atong natagamtaman nga kalisod mugna sa pagsaka sa prisyo sa mga nag-unang palaliton. Haleeeeeerrrrr ok pa mo diha?