EDITORYAL - Unsay mapaabot sa mga mamumuo sa Labor Day

Matag kasaulogan sa Adlaw sa Pamuo way laing gipaabot ang mga mamumuo kundi ang makapatagbaw nga mensahe alang sa umento sa suweldo ug uban pang benepisyo sa pagka-mamumuo.

Apan sa bahin sa mga trabahante sa pribadong sektor dinhi sa Central Visayas, may pasiuna nang pamahayag ang mga opisyal sa RTWPB nga di kaumentohan ang suhol sa mga nanarbaho dinhi gumikan kay way igong rason sa pagpatuman sa ingon.

Sa laktod tataw kaayo nga magkulismaot ang dagway kasagaran sa daghang mga mamumuo sa pribadong sektor   karong adlawa.

Apan ang maayong paabuton mao ang mensahe ni Presidente Benigno Aquino III sanglit siya ang amahan sa nasud ug posibling may isurprisa siya sa mga trabahante ug sa mga pamilya niini.

Hinuon di baya tingale angayang pug-on ang kagamhanan alang sa gipaabot nga umento sa suholan.

Kay ang balaod nagbuot nga samtang wala pay usa ka tuig sa kasamtangang umento sa suholan, di makatarunganong ipatuman na usab ang laing umento sa suweldo gawas lang kun adunay panginahanglan nga di kalikayan nga gitawag nga supervening event.

Busa tungod kay ang kasamtangang minimum nga suholan gipatuman man niadtong Septembre 2011, makatarunganon lang nga kun may umento man sa suhol, unya na usab sa maong buwan o kaha molapas pa niini.

Ang supervening event nga mahimong kapasikaran aron bisan wa pay usa ka tuig nga pagpatuman sa kasamtangang umento sa suhol, makapangayo na usab ang mga mamumuo og laing umento sa suweldo, mao ang lihok sa presyo sa asayte, mga nag-unang palitonon nga naglakip sa mga produkto sa kaumahan ug uban pa.

Apan dihang gisuta sa RTWPB kining tanan, giingon nga wa kuno kaayo mosaka ang presyo sa maong panginahanglan busa di kuno angayan nga ipatuman ang umento sa suhol niining mga panahona.

Kun wa pa mosaka ang presyo ning maong panginahanglanon sama sa asayte, nganong nangayo man og umento sa plitehan ang mga drayber sa sakyanang pasaheroan. Di ba?