Kalampusan luyo sa kakulian

Gihimo niadtong miaging Abril 14 sa gabii ang graduation sa mga tinun-an sa Mandaue City College (MCC) sa Tipolo campus sa dakbayan sa Mandaue nga gidumala ni Dr. Paulus Canete isip presidente niini.

Sa maong graduation nga gipahigayon sa Montebello Villa Hotel sa dakbayan sa Sugbo maoy mipaso ang mokabat 170 ka mga tinun-an nga midawat sa ilang diploma nga nagtimaan sa kalampusan sa ilang pagtuon.

Daw dili matukib ang gibating kahinangop sa maong mga tinun-an dihang ilang gidawat ang diploma nga alang kanila labing bililhon sanglit hingpit na man gayod nilang naangkon ang gitinguha nga kalampusan sa ilang pagtungha.

Si Kongresista Cynthia Villar nga maoy pinasidunggan nilang dinapit sa iyang pagpamulong mainiton nga mipadangat sa iyang pahalipay ngadto sa mga tinun-an sa kalampusan nga ilang naangkon.

Sa nasayran nga daghang kakulian nga nasinati sa maong

tulonghaan nga gidumala ni Dr. Cañete nga naglakip na ang mga tinguha sa pagpasirado na unta sa Commission on Higher Education kon CHED.

Daghan ang nagtuo nga ang maong kakulian nga nasinati sa maong tulunghaan makawagtang usab sa kadasig sa mga tinun-an nga motungha sa maong tulunghaan tungod sa mga kontrobersiya niining gisagubang.

Ang maong pagtuo usa ka dakong sukwahi tungod kay taliwala sa mga kontrobersiya nga nasinati daw nagkadaghan na man hinuon sa mga tinun-an nga migradwar sa high school karong tuiga ang nagpa-enroll alang sa ilang pagtungha sa pagbukas sa klase karong tuiga.

Matud pa ni Cañete nga mokabat na sa 400 ang nagpa-enroll alang sa pagbukas sa klase karong Hunyo ug iyang gipaabot nga mapun-an pa ang maong gidaghanon.