Gamay na lang ang isda

Miangkat na diay og isda didto sa gawas sa nasud ang mga negosyante og isda ingon man sardinas dinhi sa nasud sa Pilipinas. Ang Bureau of Fisheries and Aquatic Resources mitug-an nga ilang gitugotan ang mga negosyante og sardinas dinhi sa nasud nga makaangkat og isda didto sa gawas sa nasud tungod kay gamay nalang kaayo ang isda nga ilang makuha. Apan ilang giklaro nga ang ilang gitugot kadto lamang himoong sardinas ug dili kadtong ipangbaligya sa kamerkadohan. Pero sigon sa taho ang mga imported nga isda gipangbaligya na diay sa kamerkadohan.

Dili lang diay lana ug bugas ang atong giangkat didto sa gawas sa nasud, apil na diay ang mga isda sa mga gipang-angkat karon. Ang buot ipasabot niini mao nga hasta ang atong mga isda dinhi sa nasud nagkagamay maong dili na kini makasustinir sa panginahanglan sa mga negosyante og sardinas.

Seguro kun wala pa abusohi sa mga dagko ug gamay nga mananagat ang kadagatan sa Pilipinas dili seguro moabot ning panahona nga hasta isda ato nang paliton o angkaton didto sa gawas sa nasud. Ang nagkagamay karon nga gidaghanon sa isda makapukaw unta sa mga mananagat nga anaa mabuhi sa dagat sa pag-undang na sa ilang pag-abuso sa atong kadagatan. Labing seguro ang sunod natong angkaton sa gawas sa nasud mao na ang tuba kay wala na poy tuba ang atong kalubihan kay gipanggabas na ang mga lubi ug gipanghimo nang lumber.

* * *

Gibasura sa piskaliya sa dakbayan sa Sugbo ang kasong qualified theft nga gipasaka batok sa security guard sa Sinulog Foundation Office nga gipasanginlan nga milungkab sa kapin usa ka milyon ka pesos nga salapi sa foundation. Seguro nakita sa piskal nga dili qualified ang guwardiya sa kasong theft.

* * *

Giila sa testigo sa prosecution si Bella Ruby Santos nga mao ang nagdagit sa batang si Ellah Joy. Ang testigo wala makalimot ni Bella Ruby tungod sa pilit kaayo niining pahiyom ngadto kaniya sa dihang nag-abot ang duha nila ka mga mata. Leason to learn: ayaw pahiyomi ang tawong makakita nimo kun maghimo ka og krimen.