Ang magnificat ni Maria

Usa sa mga asoy sa ebanghelyo sa mga Misa de Gallo mao ang Magnificat ni Maria. Ang iyang awit sa pasalamat ngadto sa Dios dili tungod sa iyang kinaugalingon nga katuyoan ug pahanungdan kun dili gumikan sa Diosnong kaayo nga tungod niini siya bisan sa iyang kaubos ang gipili gihapon sa Dios alang sa linain nga tahas ug gimbuhaton. Wala siya magpagarbo niini ug gani, diha sa balaang kasulatan wala man igdungog nga siya dunay gihimong pagpasiatab sa iyang nadawat nga panalangin ngadto sa uban.

Ang kasaulogan sa Pasko panahon sa pagpasalamat bisan pa man sa mga higayon nga nasinati nato ang mga kapakyasan ug kalisdanan. Ang yanong “thank you!” dako na kaayo og kahimoan nga ang naghatag ingon man ang gihatagan makasinati kun unsa diay kabililhon ug kamahinungdanon ang maong panagtagbo diha sa natad sa pagkamanggihatagon. Oo, adunay mga higayon nga ang kinabuhi bugal-bugalon. Apan angay natong hisayran nga kun kita gisakit, dunay uban nga mas gisakit pa kay kanato. Ayaw tungloha ang pagkawala nimo’y sapatos kay dunay uban nga bisan wala’y tiil nagpabilin gihapon nga malipayon.

Ang Magnificat ni Maria nagpahinumdom kanato kun unsa diay kaayo ug katahom sa kinabuhi. Sa akong bahin, nakit-an ko gihapon ang hinungdan ug tumong sa panaw sa kinabuhi. Padayong nisantop sa akong hunahuna ang mga tudling sa awit nga among awiton niadtong college pa ako. Love is the answer ang ulohan niadto ug kini nagkanayon.

Love is the answer to so many questions now I know so I can stop my endless wand’ring. Love gives the meaning to my world, I see the answer now!

Sama ni Maria nga nirisgo tungod sa iyang gugma sa Dios kita usab ang gidapit sa pag-amgo nga ang kinabuhi usa ka makanunayong pagpili sa mga butang o tawo o panghitabo nga makahatag kanato og kalipay!