Bohol is beautiful

Kapin na sa 15 ka tuig sukad sa akong katapusang pagbisita sa lalawigan sa Bohol. Akong nadeparahan nga kusog ang pag-ugmad sa maong probinsiya labi na sa natad sa turismo.

Ang bugtong siyudad nga mao ang Tagbilaran City namungingi na sa mga dagkung tindahan ug mga malls. Malinawon ang maong siyudad ug ang tibook Bohol. Maayo usab ang pagkamentinar sa ilang kadalanan bisan sa hilit nga mga dapit. Dalaygon ang pagdumala ni Mayor Dan Lim sa maong dakbayan.

Gawas sa naila na kaayong Chocolate hills, Loboc river, Panglao beach ug Tarsier anaa usab ang mga karaang simbahan ug kabalayan. Mahimo usab ikaw makigsandurot sa kinaiyahan pinaagi sa pagsakay sa zipline nga motadlas ibabaw sa kalasangan. 

Ayaw kalimot pagsakay sa raft nga mosuroy kanimo sa Loboc river diin haranahan ka sa mga bata samtang manihapon. Maanindot ang mga colorful lights nga anaa sa daplin sa sapa. Kini ang resulta sa paninguha sa grupo ni FCB President Argeo Milissimo nga mao usab ang vice chairman sa Central Visayas Regional Development Council (RDC).

Sa imong pagpauli, magkabayayat ka sa mga pasalubong nga kalamay, peanut kisses, ube candy, pulboron ug daghan pa. Kun matagbaw ka na sa paglulinghayaw sa Cebu bisitaha ang Bohol nga dili makaabot og duha ka oras ang biyahe sakay sa fastcraft.

* * *

Nganong hilum man kaayo ang urban poor sa tinguha sa konseho nga paglaslas sa budget sa Cebu City alang sa sunod tuig? Uyon ba lang sila nga dili mahatag kanila ang pundo alang sa drainage system ug ubang batakang serbisyo?

Atong makita kining mga urban poor nga gamiton sa mga walhong pundok aron pagpakigbatok sa Estados Unidos ug mga palisiya sa gobiyerno nga ilang magamit alang sa ilang propaganda.

Sayon ra kaayong makagahin ang mga konsehal alang sa Holiday Spa aron sila maka-exercise ug makapamasahe, mamalit unta og mga fire protection gear alang kanila aron maghawodhawod kun dunay sunog ug ang pagbayad sa pamilyang Rallos bisan kun anaay opinyon ang Commission on Audit (COA) batok niini. Apan kun alang na gani sa serbisyo alang sa mga kabus daw dili man priority sa mga konsehal.

Mga kabus ipabati ang inyong tingog!

* * *

Mas maayong hunongon na nato kining debate kalabot sa flyover. Nawala na ang atong pagtutok sa mga butang nga maayong ipatuman dinhi sa siyudad.

Kadtong findings and recommendations sa Technical Working Group (TWG) nga gimugna sa Regional Development Council (RDC) - Infrastructure Development Committee (IDC) adunay daghang mga maayong punto gawas sa pag-angan-angan sa katukuran sa flyovers sa dili pa mahuman ang usa ka master plan.

Napagan kini tungod kay kadaghanan sa mga sakop sa IDC wala mouyon nga iduso kini didto sa RDC Full Council. Ang akong nasayran nga gihatagan ni RDC chairman Mayor Mike Rama si Pres.Aquino sa dihang gipatawag siya didto sa Malacañang uban sa flyover proponent Rep. Cutie del Mar.

Husto na ang lalis. Ato nalang paabuton ang hukom ni P.Noy.

Email: [email protected]