EDITORYAL - Usab pa mo?

Si Mayor Mike Rama mihimo lang sa angay niyang buhaton isip lider ning siyudad nga di na magpaabot   nga punayan lang og latigo sa uban niyang kaubanan nga kun imong hunahunaon mura siya og bata nga angayang tudloan sa angay niyang buhaton.

Si Mike, lahi sa uban nga misaka lang dayon sa pagkamayor, kay nag-agi siya og pila ka tuig sa pagka-magbabalaod sa konseho sa dakbayan sa Sugbo ug nahimo pang bise mayor.

Sa laktod kun unsa may iyang gibuhat karon, nasayud siya kun nganong iya kanang gihimo ug di na siya angayan pang diktahan sa angay niyang buhaton

Kay daghan ang nagtuo nga may ubang mga tawo nga nagpakita sa ilang abilidad sa pagdiktar kunohay kang Mike sa angay niyang buhaton apan ang tinuod mas labaw pa og abilidad kanila si Mike.

Tan-awa na oh, sa dugay na niyang luom-luom nga di makapasakit og sulti batok sa suod niyang higala sa personal ug sa politika kaniadto, di nakalitok siya sa tukma gyud ug angayan niyang isulti nga talawan si Kongresista Tommy.

Nasayud ang   tanan nga puwerti gyung pugong sa mayor   nga di siya makapabug-at og sulti kang Tommy, apan unsaon mang sugo naman sa panahon, pamasin pa nga sa makausa   pa pinaagi sa pintok   kaayong sulti mahaigking usab ang hingtungdan og makaingon, “mosukol man diay”.

Kay si Mike di man pareha sa kasag nga bisan huypon lang nimo ang mata dali kaayong mokangkang   ang mga paak bisan way paakunon.

Si Mike sama sa usa ka Tigre nga magpiyong-piyong lang una sa mata apan inigkamatngon nga may angayan siyang hambaton, ay di gyud ka lung-an kutob sa mahimo iwisi-wisi gyud ka sa husto.

Ikaduhang misagunto kang Mike human kang Tommy mao ang taga DILG dihang iyang giingnan nga hinloi una ang inyong kaugalingon una mo manghinlo sa uban.

Kana bayang sultiha ni Mike di binata nga mahimo lang imong ilingiw, tingog ug sulti sa usa ka dakong opisyal nga kun ang hingtungdan may igo usab nga kabuot, aw manlipaghong gyud sa kauwaw ug angayan lang ingnon, unsa man usab pa mo?  Di   ba?