Kinsa ang protektor sa mga smuggler

Milihok na usab ang dakong kamot sa Bureau of Customs sa Port of Cebu aron makalusot ang 17 ka container vans nga giingong ang sulod mga constructions materials pero diay mga sinakong bugas. Kung kinsa ang dako’g kamot diha sa Bureau of Customs sa Port of Cebu nga midupa aron makalusot ang sinakong bugas mao ni ron ang atong ila-ilahon.

Kaniadtong Mayo 19, 2011 ang opisina sa Administrator sa National Food Authority pinaagi ni Atty. Malik Camid miawhag kang Atty. Ronnie Selvistre, District Collector sa Bureau of Customs, Port of Cebu sa pagpagawas og kamandoan sa pag-alerto ug pagbukas sa mga vans nga naka-consigned sa RCLB Mercantile nga nahimutang sa Taloot, Argao, Cebu tungod kay misdeclared kini. Ang dokumento nag-ingon nga mga construction materials ang sulod sa 17 ka mga container vans apan gidudahan nga mga sinakong bugas.

Sigon sa dokumento nga akong nadawat ang Bill of Lading No. EGLV 235100149681 adunay upat ka container vans, ang EGLV 235100149699 adunay lima samtang ang MCPU 553968231 adunay walo ka mga container vans ug kining tanan gikarga sa barkong Altavia.

Hinumdomi ninyo, Mayo 19, 2011 gipahibawo na ang Customs Cebu sa opisina ni National Food Authority Administrator Angelito Banayo kalabot sa kadudahang kargamento pero pagkasunod adlaw, Mayo 20, 2011 ang mga kargamento hinay-hinay nga nahanaw. Mayo 23, 2011 mipagawas og kamandoan si Commissioner Angelito Alvarez sa Bureau of Customs sa iyang mga ginsakpan sa Port of Cebu sa pag-examine ug paghimo og spot-checking sa kadudahan nga mga kargamento. Kay 17 lagi ka container vans, dili madali ang pagdispatsar busa naabtan pa og Sabado ang pagtago niini.

Ang pangutana nganong wa man dayon pugngi sa taga Bureau of Customs sa Port of Cebu ang mga gidudahan nang kargamento? Nganong ila pa man nga gipalusot ang pinalusot nga bugas nga unta daan naman silang nasayod niini? Seguro gamhanan og dako’g kamot ang mitapion ug mitabang pag aswat sa 17 ka mga container vans aron kini makalusot.         

* * *

Ulohan sa usa ka nasudnong pamantalaan kaniadtong Domingo ang posibling paghulip sa katungdanan ni Customs Commissioner Angelito Alvarez gumikan sa kapakyas niini sa pagpakgang sa smuggling operation dinhi sa Sugbo.

Dili ikalimod nga harap-harapan gihapon nga gipadayon sa mga smuggler ang ilang operasyon dinhi sa Sugbo, Davao ug Cagayan. Gani, kaniadtong martes sa gabii akong gihinabi sa akong tulomanon SAKSI EVENING EDITION sa DySS Super Radyo Cebu si Commissioner Alvarez aron ipaabot ang operasyon sa mga smuggler. Sa nahisgutang tulumanon iyang gipasalig nga lantawon ug sulbaron ang nahisgutang suliran. Manghinaut ko nga dili lang siya kutob sa estorya.