EDITORYAL - May 21, judgement day

“Judgement Day May 21, 2011”, napatik kining maong pahibawo sa atubangang pahina sa The Philippine Star niadtong Mayo 14, 2011.

Sa caption sa retrato sa dakong trak kansang kilid gisuwatan sa maong pahibawo, didto gipasabot nga ang nagsabwag sa maong balita mao ang Family Radio nga nagbase sa Estados Unidos.

Sa pagkakaron wa nay tawo nga makadungog og preskong tingog o sulti gikan sa baba sa Dios kay ang tanan iya nang gipapatik sa Biblia ug wala nay nadugang niana sukad tak-opi ang maong basahon ug giimprinta sa mga imprintahanan.

Sa Biblia nga maoy gikasulatan sa mga pulong sa Dios ug ni Kristo, pintok kaayo ang pagpatin-aw nga way laing nasayud kanus-a taposa sa Dios ang kalibotan gawas lamang Kaniya (Dios).

Bisan si Kristo sa iyang kaugalingon wa masayud kun kanus-a siya pabalika sa Dios nganhi sa yuta nga maoy kataposan sa kalibotan.

Inigbalik ni Kristo sa yuta, ang tanang dad-onon sa langit mosugat kaniya magdungan ang mga buhi ug ang tanang nangamatay nga pagabuhion pag-usab.

Samtang kadtong di para langit, mokuwentada pa og 1,000 ka tuig una sila mabuhi apan itambog ngadto sa linaw nga kayo.

Busa kun way laing nasayud gawas lamang sa Dios bahin sa kataposan sa kalibotan, kinsa kaha ning taga Family Radio nga nagpatuo sa maong binuang. Di   ba?