PDEA dawat lang og limpiyo

Sa miaging pipila ka adlaw gipanghambog sa Philippine Drug Enforcement Agency o PDEA-7 nga nakasakmit sila og usa ka kilong cocaine nga nagkantidad og lima ka milyon ka pesos gikan sa mipalusot niini. Gitug-an usab sa PDEA nga nakalingkawas ang mipalusot sa cocaine tungod kay natunogan ang ilang mga agent sa tigpayuhotan og ginadiling drugas hinungdan nga kini naniguro sa pagsibat.

Apan usa ka kasaligang tinubdan ang mihatag kanako og kasayoran mahitungod sa tinood nga hitabo sa pagkasakmit sa PDEA sa usa ka kilong cocaine sa may dalan A. Lopez, Barangay Labangon ning dakbayan.

Ang akong kasaligang tinubdan kinsa usa usab ka law enforcement officer nga gitahasan sa paglutos niadtong mga nagpayuhot og ginadiling drugas mitug-an nga dili tinood nga nasakmit sa taga PDEA atol sa gipahigayong buybust operation ang usa ka kilong      cocaine.

Ang tinood mao nga human masakoti sa mga operatives sa City Anti-illegal Drugs Special Operations Task Force Intelligence Branch sa Mandaue Police Station 5 ug sa Special Weapons and Tactics team ang cocaine sa panimalay ni Parhana Ebrahim alyas Furuki, ang mga operatives nakatunog na sa amigo niining ginganlan og Imam nga aduna usay laing usa ka kilong cocaine. Apan si Imam nga adunay anak nga Colonel sa Philippine Army gikombinser sa iyang anak nga isurender ang cocaine ngadto sa PDEA ug dili sa Police. Sa laktod nga pagkasulti walay buybust operation kun dili gisurender ang maong cocaine ngadto sa taga PDEA.

Nganong mamakak pa man gyod ang taga PDEA, aron ba lang dili sila maklaro nga modawat lang og limpiyo? Wa man ugod ta makadungog nga mipakita sa maayo nilang labok ang taga Philippine Drug Enforcement Agency mahitungod sa ilang trabaho paglutos niadtong mga nagpayuhot og ginadiling drugas. Mao nang mangangkon na lang. Pagkatoytoy kun ugaling tinood kining maong kasayuran nga gihatag kanako sa akong kasaligang tinubdan. Ambot lang!!