EDITORYAL - Ang saksing kasaligan

Kun gamiton gihapon sa mga polis ang mga bata nga mitumbok sa managhigugmaay nga si Sven Erik Berger ug Karen Castro Esdrelon nga maoy midagit ug mipatay kang Ellah Joy Peque aron motumbok sa lain na usab nga suspetsado nga ipresentar sa kapolisan, lisud nang saligan ang maong mga bata.

Kini tungod kay di na angayan silang tuohan ug di na angayang himoong sandiganan ug saligan nga ang pamahayag sa mga bata kasaligan kay tinuod.

Tinuod nga ang mga bata motug-an gyud sa tinuod, apan di nimo sila kasaligan nga sa tanang higayon makasag-o sa mga dagway sa mga tawong ilang makita.

Sama sa nahitabo kang Ellah Joy, gitug-an sa mga bata ang tinuod nilang nakita nga gidagit ang biktima sa usa ka Filipina nga kuyog sa usa ka langyaw, sakay sa usa ka itom nga sakyanan.

Ang pangutana, mitug-an ba sila sa tinuod nilang nakita bahin sa biktima? O gitug-an nila ang ilang nakita, apan bahin sa mga dagway sa mga suspetsado, nakatug-an ba sila? Ah wa kay di mahitabong may kaluha si Berger ug si Esdrelon diin samtang ang usa midagit sa biktima, ang laing kaluha usab nag-check-in didto sa Waterfront hotel.

Gawas tingale kun mangita og laing mga saksi ang kapolisan, sa higayong may ipresentar sila nga laing suspetsado sa pagdagit ug pagpatay kang Ellah Joy, matumbok tingale ang tinuod nga kriminal.

Kay ang dakong kalagmitan sa mahimong saksi nga katuohan sa hukmanan nga maoy motumbok sa tinuod nga kriminal, mao ang mga paryente, higala, o kaha dili kaila sa mga suspetsado kansang tinguha sa pagtug-an sa kamatuoran mao ang giandam nga ganting salapi nga gitagana nga ihatag niadtong makatabang pagsikop sa tinuod nga kriminal.

Mao bitaw nga sa sayo pa gipasabot na sa atong Editorial nga kun paryente mo, higala o kaha di kaila, kun nasayod mo sa tinuod nga kriminal, mas maayong di kamo modepensa kanila, aron di mosangpot sa grabe pa unyang krimen nga ilang buhaton sa mga kabataan sa umaabot nga panahon.

Kay kun inyo silang itolerar, di kaha mahitabo nga hasta mo ihawon nila ugma damlag?

Ang ganti, mas maayong himoong sekondarya nalang, apan ang mahinungdanon mao nga kinahanglang masilotan aron sa makausa pa di na sila makapamiktima pa og lain. Di   ba?