Dakung gasto

Unsa kaha ang ipasabot nga ang Central Visayas, apil na ang dakbayan sa Sugbo, ikatulo man nga rehiyon sa nasud nga labing daghan og mga tawo nga napriso?

Maisip ba nga brokento o palaaway kitang mga Bisaya? Tiaw mo ang rekords sa Bureau of Jail Management and Penology (BJMP) nagkanayon nga 7,263 ka binilanggo ang anaa sa lainlaing prisohan sa rehiyon.

Ang 6,044 niini mga hamtung na og pangedaron ug 186 ang menor-de-edad. Mao kini ang statistics sa BJMP kaniadtong buwan sa Septiyembre. Wala pa mahibaw-i kun misaka o mius-os ba ang gidaghanon sa mga priso.

Nadani ang akong pagtagad kay tiaw mo ikatulo kita sa Central Visayas nga labing daghan og priso.

Sa tibuok nasud, ang labing daghan og mga priso mao ang National Capital Region nga naglakip sa Manila kay ang ilang binilanggo miabot og 18,245, unya gisundan sa Region 4-A nga dunay 7,907.

Ang rekord nagpakita nga daghan sa mga nabilanggo nakahimo og kalapasan sa Comprehensive Dangerous Drugs Act of 2004, mahimong sila mga drug pushers ug tiggamitan og drugas.

Kun imong hinuktokan pag-ayo, ang pagdaghan sa mga priso usa sa makapaut-ot sa atong kwarta sa kagamhanan. Mangutana mo og ngano?

Ang BJMP migahin og subra sa P30 nga pagkaon sa mga priso matag adlaw. Kay ang tanang priso sa tibuok nasud miabot man og 62,556 nagpasabot nga ang gobyerno mogasto og kapin sa P3.1 milyones nga para sa ilang pagkaon matag adlaw.

Kun ibutang nimo nga ingon lang niini kanunay ang gidaghanon sa mga priso mata’g adlaw, nagpasabut nga ang kagamhanan mogasto og P1.1 bilyones alang ra sa pagkaon sa mga priso sa tibuok tuig.

Sayonan ka ana nga kantidad? Mahimo na kana nga ipatukod og daghang mga proyekto. Wala pa gani labut sa sweldo sa daghang mga gwardya sa prisohan ug sa ubang gastohanan.

Kun magbinuotan ra g’yud kitang katawhan, likayan nato ang pagpakasala.Mata’g usa kanato motabang aron ang atong nasud molambo.

* * *

Atul sa among operation sa Land Transportation Office (LTO) didto sa Mabolo kaniadtong Biyernes sa gabii, dunay batan-on nga nag-drive og motorsiklo nga walay suga, mitanyag nga iya ra ko nga bayran aron dili siya dakpon.

Sa laktud nakaminus tingali ba. Nagtuo siguro nga kaming mga deputized agents sa LTO mabayran. Gipangutana nako kun nagtrabaho ba siya kay gusto nako nga sutaon kun pila ang iyang sweldo.

Wala man gani magtrabaho. Mipuyo ra siya sa iyang maguwang ug paghatagan ra’g kwarta. Gipakita nako sa akong ID pagka sakop sa PRESS ug gitug-anan nga wala ko magkinahanglan sa iyang ihatag. Resulta, wala g’yud hinoon ko malooy nga misakmit sa iyang lisensya ug midakop kaniya sa kalapasan sa lagda sa pagmaneho’g sakyanan. Tambag nako ninyong mga drayber, ayaw g’yud mo pagkasipyat kay kun ako ang inyong pakauwawan nga tanyagan og bayad aron dili mo dakpon, mosamot ang inyong problema.

Unya, kamong mga driver sa mga taxi nga na-calibrate na ug mikolekta nag mahal nga pletehan, ayaw g’yud kasipyat nga mo-drive nga dili mag-uniporme, unya mag-tsinilas kay sigurado na g’yud mo nga makamulta. Kay mahal na man ang plete sa inyong sakyanan, ayaw ninyo sakripisyoha ang inyong pasahero nga lago kaayo nang inyong gisul-ob ug kuyaw sa aksidente kay wala kamo magsapatos.

Kun magtinarong kamo nga mga drayber, wala g’yuy problema ug dili kamo mahadlok sa mga LTO checkpoint operations.