Corrupt nga enforcers

Ang mga traffic managers sa lainlaing syudad ug lungsod sa Metro Cebu miangkon atul sa gipahigayong Traffic Summit nga duna g’yoy ilang mga traffic enforcers nga mangilkil sa mga drayber.

Nakapanglingo-lingo ko nga namati niini direkta gikan sa mga traffic officials kay dili na kini “hearsay” kay sila na gud ang miangkon nga mga sakop nila nga corrupt.

Si Mandaue City assistant prosecutor Bienvenido Mabanto nga maoy pangulo sa traffic enforcement arm sa Mandaue namahayag nga daghan na sila og mga traffic enforcer nga gitaktak sa serbisyo tungod sa maong rason.

Mao kini ang rason nga maduhig sa kauwawan ang ubang traffic enforcers nga nagtinarung.

Panahon nga magsul-ob ko’s akong uniporme isip deputized agent sa Land Transportation Office (LTO) usahay maghuna-huna ko kun wala ba kaha ko biay-biaya sa mga tawo.

Kini maoy rason nga ipasabut gayud nako sa mga drayber nganong nag-deputized agent ko sa LTO. Mao usab kini ang rason nga bisan ang mga tinugyanan sa balaud nga makasala, dakpon g’yud nako.

Ang ako ra nga ikapasalig nga buotan kaayo ko nga manakop kay giisip man nako ang mga drayber nga nakahimo’g sayop nga tarung gihapon sila nga mga tawo, apan nakasala lang mao nga tudloan nako sila’g leksyon.

Sagopon nako ang baruganan ni Mabanto nga ang pagtudlo og leksyon mao ang estrikto nga pagpatuman sa balaud.

Balikan nato ang mga traffic enforcers nga mangilkil sa ilang madakpan, kining matanga sa mga tawo dili angay nga tugyanan sa maong mga trabaho.

Matud ni Mabanto nga duna sila’y pipila ka enforcers sa Mandaue nga gipangkuhaan nila’g T-O-P aron dili na makadakop og drayber, pastilan miingon kuno “Ah, wala pa mi sweldo kuhaan pa mi’g TOP?”

Unsay buot ipasabut sa maong pagkasulti? Sa ato pa mangwarta g’yud diay ang ubang enforcers sa ilang dinakpan. Ako dugay na ko nga nag-operate apan wala pa ko makasuway nga dunay misuway’g suborno nako.

Kining mga tawhana gapakauwaw lang g’yud. Mao na nga kun kaming mga sakop sa LTO Task Force Alpha ang manakop, kaming mga team leaders mopasabot g’yud sa among madakpan nga lahi ang among grupo. Hagit lagi namo sa mga nadakpan namo, sultihi ko pananglit dunay nangilkil sa among mga kauban kay ipasalig nako nga taktak dayon kini sila sa serbisyo.

Unya kun kamong ubang traffic enforcers madakpan ninyo ang akong mga kauban nga makahimo og sayup sa pagmaneho’g sakyanan, ayaw pasayloa.

Nasayud sila sa balaud sa tukmang pagmaneho og sakyanan unya sila makahimo’g sayop? 

* * *

Kay uyon man si Mayor Mike Rama sa among sugyot sa Task Force Alpha nga silotan g’yud ang mga polis ug CITOM enforcers nga masakpan nga makahimo’g sayop sa mga lagda sa Transportation and Traffic Code angay g’yud niya kini nga tinud-on.

Usa ka kulumnista sa mantalaan dinhi sa Sugbo nakapangutana kun kinsa ang modakop sa mga polis ug CITOM nga makahimo’g sala sa balaud sa trapiko.

Dili nako siya mabasol kay wala man siya masayud nga sa operation sa LTO daghan kami’g nadakpan nga mga tinugyanan sa balaud. Lisud kaayo mapasaylo ilabi na kun maglambigit na og rehestro sa sakyanan ug lisensya sa drayber nga expire. Maayo unta og makasabut ang mga higala nato nga kapolisan ug militar.

Sama ra gud sa ubang sakop sa LTO duna man sila’y armas gilukatan man g’yud nila og lisensya.