Puyde ba magkuyog ta

CEBU, Philippines - Human sa walo ka tuig nga pagpahigayon og sunod-sunod nga mga anti-drug ug anti-corruption seminars dinhi sa Sugbo, ang New Generation Against Drug and Corruption o NEWGAD miadto sa Bohol alang sa pagpahigayon og anti-drug seminars sa mga tinun-an nga mograduwar sa sekondarya.

Kaniadtong Enero 29 ning tuiga ang Sangguniang Kabataan Federation sa Lungsod sa Bien Unido sa lalawigan sa Bohol ubos sa pagpangulo ni John Michael “JM” Boniel ug Pre-Lex Society sa Southwestern University ubos sa pagpangulo ni Corter Palange mipasiugda og usa ka maayong programa nga angayang sundon sa uban - ang pagpaubos sa anti-drug seminar sa mga mograduwar sa sekondarya sa tulo ka mga tunghaan sa lungsod sa Bien Unido, Bohol.

Ang tulo ka mga tunghaan mao ang Carlos P. Garcia National High School, Holy Child Academy ug Bien Unido Academy.

Kuyog sa pangulo sa New Generation Against Drug and Corruption nga si Danny Torralba, pipila ka mga opisyal ug sakop among gitabok ang dagat aron isangyaw ang among misyon - ang pagkab-ot og usa ka drug ug corrupt free nga nasud.

Kami mapasalamaton kaayo sa mainitong pag abi-abi nila ni Sir Jener Boniel, principal sa C.P.G National High School ug iyang mga magtutudlo, Sir Ver Autida, principal sa Bien Unido Academy ug iyang mga magtutudlo ug Maam Nene Gales sa Holy Child Academy.

Sigon sa talaan sa atong kapulisan 65-75 porsiyento sa mga krimin nga nahitabo dinhi sa nasud mugna sa illegal nga drugas busa kun atong masumpo ang illegal nga drugas 65-75 porsiyento usab sa krimin ang mawagtang o mahanaw busa puyde ba magkuyog ta sa pagkampanya batok sa illegal nga drugas.