CPDRC

Tungod ba kini sa ilang pagkabutang sa prisohan, o sa pagtratar kanila, o sa atong kinaiyang Sugboanon, nga ang atong mga piniriso sa CPDRC makahimo’g butang nga makahatag og pagdayeg sa tibuok kalibutan sa lalawigan sa Sugbo?

Sa ubang nasud, adunay mga prisohan nga moderno gyud, kompleto sa pasilidad, wala maghuot ang mga binilanggo. Sumala, kadtong nagsunod sa salidang “Prison Break”, masina gyud ta nga nindot ug hamugaway gyud ang ilang pasilidad.

Apan ikomparar ang ilang interaction sa ilang isig katawo, lahi ra kaayo sa mga Sugboanon. Tingali tungod kay ang suporta sa ilang pamilya mas kulang kaysa ato, o mas menos ang ilang kahigayonan nga makigkita sa ilang mga mahal sa kinabuhi. O basin gitratar sila nga komo konbikto o nag-atubang og kaso, sila wala nay gimahal o nagmahal kanila.

Tingali dinha sa CPDRC, ilang nakita nga wala gyud sila total nga gisalikway sa sosyedad bisan pa sa ilang mga nabuhat, nga ilang makit-an nga aduna sila’y dakong mabuhat aron makapakita ug makahatag og kalipay ug paglaum sa kalibutan.

Gani, tingali kini ang aktibong prisohan nga kinadaghanan og bisita nga turista. Apan dili sama sa Auschwitz sa Poland nga kun moduaw ang mga turista, maoy ilang mahinumduman ang minilyon ka Hudiyo nga gipanglawog sa gas chambers, ang mga turista nga moari diri dili ang pagkasagmuyo o kaguol ang bation. Ang mga bisita sa CPDRC malingaw, malipay, ug bation og paglaum.

Mao ni ang paboritong prisohan ni Michael Jackson. Ug dinhi, gipadayag ang kawsa ug mensahe sa maong artista nga mao ang kalinaw alang sa tanan.

Niining semanaha, naghatag na sad og dungog ang atong mga piniriso sa CPDRC sa ilang pagsayaw uban sa choreographer ni Michael Jackson nga si Travis Payne, sa sayaw nga “The Drill” nga giduyogan sa kanta nga “They Don’t Care About Us”, nga gisayaw ni Michael Jackson sa katapusan niyang salida, sa wala pa kini mamatay.

Ug sa makausa pa, nakita sa tibuok kalibutan ang usa ka butang nga mahimong buhaton sa mga Sugboanon nga dili mabuhat sa kadaghanang lugar sa kalibutan.

* * *

Alang sa inyong mga panahom, palihug email sa [email protected]. Daghang salamat.