EDITORYAL - Dugoong hitabo gibaliwala

Dihang gipakita ang video clips sa masaker sa Maguindanao sa hearing sa maong dugoon nga hitabo daghan ang wa makaako sa pagtan-aw.

Usa ka paryente sa usa ka biktima nakuyapan. Ang lalaking abogado sa usa ka biktima ang gikatahong misuka.

Apan suma pa sa balita si Mayor Andal Ampatuan Jr., nga maoy principal suspect sa masaker, wala matandog.

Nagpunay og hapas og liniment sa iyang tangkugo ug nagsigi’g panghuy-ab. Baliwala lang kaniya ang dugoong talan-awon nga nakapakurog sa atay sa mga nanan-aw sa video footage.

Unsa may buot ipasabot sa maong wa’y pagpakabana ni Ampatuan? Unsa may implikasyon niini sa grabeng kaso nga iyang giatubang?

Ang gibalitang reaksiyon sa murder suspect gihatagan og nagkalainlaing kahulogan sa mga nitambong sa hearing. Usa niini mao ang pagduda kun duna bay kasingkasing ang suspek.