EDITORYAL - Ang idyalismo sa kabatan-onan

Naobserbahan kun namatikdan nga daghan sa mga batan-on nga “first time voters” ang naninguha nga makaparehistro sa Comelec.

Kini mipakita sa dakong interes sa atong kabatan-onan sa pagsalmot sa proseso elektoral. Ug sa ilang tinguha nga makaapil sa pagpili sa mga tawo nga angayan himuong lider sa atong nasud.

Kining tumang kaikag sa mga batan-on nga makasalmot sa usa ka labing bililhon nga kalihukan mipakita usab nga buhi pa diha sa mga batan-on ang idyalismo nga nakapadayeg ni Jose Rizal kanila isip “Hope of the Fatherland.”

Atong pahalipayan ang atong kabatan-onan tungod sa pagpakita sa ilang patriotismo kon kabayanihon ngadto sa ilang yutang natawhan.