Wa untay lunop kun gi-implementar pa ang balaod?

Matod pa sa Sugboanong environmental lawyer nga si Tony Oposa, adunay balaod nga ato lamang gipakatulog ug wala tumana sulod sa 20 ka tuig, nga maghatag unta og alibyo aron dili maglunop kun timpo sa grabeng ting-ulan o bagyo. Kining maong balaod nagsugo sa Department of Public Works and Highways kon DPWH nga magtukod og mga lungag-tigumanan o agianan sa inawas nga tubig sa matag barangay.

Ang ideya mao nga ang sobrang tubig masalo ug adto matigom sa usa ka lungag o kanal nga tukuron unta sa matag usa ka barangay. Sa ingong paagi, dili kini mobanaw sa yuta aron maghimog kadaot. Kun ugaling aduna may sobra nga tubig nga mobanaw, menos na lamang kini.

Dili usa ka komplikadong proyekto ang gisitar sa balaod. Simple lamang kini. Busa nahibulong kita nga wala kini matuman. Ni-komentaryo si Oposa nga makahimo man gani kita’g mas lisud ug gastoso nga proyekto, nganong dili man kining simple lang nga trabahoon.

Matod pa ni Oposa, sa sobra sa 40,000 ka barangay sa atong nasud, ang DPWH nakahimo pa lamang og wala gani kaabot sa napulo ka buok sa maong proyekto. Usa ka simpleng catchbasin, wala kaabot sa napulo ang nahimo sulod sa baynte ka tuig. Grabe, classic!

Nga sa ato pa, nagmika ug nagkulang diay kita. Nga sa ato pa, ang mga pagbaha sa Manila ug sa Luzon dili gyud unta sama ka dako ang kadaot kun giaksyonan pa unta nato ang gipatuman sa balaod, nga sa ato pa, ang pag-antos sa atong kaigsoonan sa Manila ug Luzon, ang mga danyos sa agrikultura malikayan diay unta.

Kun mao, dili ba angayan nga magpatawag ang mga kongresista og usa ka imbestigasyon nganong wala giimplementar sulod sa baynte ka tuig ang balaod nga ilang gipanday? Daghan kaayong mga opisyales nga mipapel niining kalamidad nga giatubang sa nasud. Wala baya sila sud-ipi nga migamit sa pagka-miserable sa katawhan aron makabentaha sa mapalambo sa ilang kampanya? Pagka-miserable nga sila adunay kalabutan sa hinungdan?

Tinuod, ulahi na ang pagbasol. Wala na kita’y mahimo sa human na mahitabo. Apan kun padayong wala kita’y lakang nga himoon, kun padayon nga ibale-wala nato ang balaod, nagpatara kita sa matag tag-ulan ug bagyo nga atong masugatan nga masinati na sab simbako ang paglunop.

Alang sa inyong mga panahom, palihug email sa [email protected]. Daghang salamat.