Nabalaka gyud si Mayor Tomas Osmeña sa gipalutaw karon nga tandem nilang Kongresista Antonio “Tony” Cuenco ug kanhi Mayor Alvin Garcia sa 2010 nge eleksiyon.
Hapit kada adlaw, si Tomas milatigo kang Tony bisan sa mga gagmay ug mga hanap nga mga isyu.
Timailhan kini nga si Tomas nahadlok sa Tony-Alvin tandem.
Kun akoy Tomas, mahadlok gyud ko tungod sa kadako sa impluwensiya ni Tony sa habagatang distrito sa siyudad.
Nasayod si Tomas nga lisud banggaon si Tony kun modesider ang kongresista pagdagan pagka-mayor sa siyudad.
Nasayod si Tomas nga taas og respeto ni Tony ang mga taga habagatang distrito.
Samot na nga ang mga kapitan nga loyal sa Bando Osmeña Pundok Kauswagan tua pirme magyampungad sa balay sa kongresista sa barangay Guadalupe. Kun manglarga sa Manila, duawon gayod si Tony sa iyang balay sa Makati.
Dili lang kay kana ra, adunay mga konsehal sa BOPK nga sekreto usab nga nakig-abin kang Tony bisan niadtong mga higayon nga init na kaayo ang tinagdan sa mayor ngadto sa kongresista.
Kining mga konsehal sa siyudad adto magyampungad sa balay ni Tony, samtang kun mangadto sa Manila tuyoon gyud og duaw ang panimalay sa kongresista sa Makati.
Dili na lang nato hinganlan kinsa kining mga opisyala, apan mas maayong si Tomas maoy mangita sa mga ngalan nianang mga kanahan niyang mga kaabin. Wala hinuon ko masayod kun naabot na ba kini sa dunggan ni Tomas. Tingale, mosamot ang kalagot sa mayor kun iyang masayran nga adunay mga kapitan ug iyang mga konsehal nga sekretong nakig-meeting kang Tony.
Maglagot siya dili tungod kay gibisita si Tony sa mga tawong kanunay nag-chuwawap niya. Ang iyang kalagotan nga giilad lang diay siya sa iyang mga tawo.
Gani, adunay mga kanhi konsehal ug kanhi kapitan nga magpirmehan sa panimalay ni Tony.
Kay nanghitabo kini, masabot nato nga angay kahadlokan sa kampo ni Tomas kun makabuylo na ang Tony-Alvin tandem.
Katapusan namong panagkita sa kongresista didto sa iyang opisina atol niadtong State of the Nation Address (SONA) ni Presidente Gloria Macapagal-Arroyo niadtong Hulyo 27, mitug-an siya nga mahadlok siyang mag-mayor tungod kay sa lehislatura kun pagpanghimo og balaod siya eksperto.
Usa usab, mas gipili ni Tony Cuenco nga mokampanya og presidentiable kay sa modagan og lokal nga posisyon.
Apan mailhan kaayo ang kabukas sa kasingkasing ni Tony Cuenco sa hagit pagdagan pagka-mayor, ilabi na nga kanunay siyang giaway ni Tomas tungod sa butang nga walay hinungdan, ilabi na nga ang mga mayor kanunay’ng nanawag ug personal nga miawhag kaniya pagdawat sa hagit. Tiaw mo na, mismo ang loyal kaayo ni Tomas, ang akong higalang si Kapitan Pancho Ramirez uyon nga modagan si Tony Cuenco pagka-mayor kay ni Mike.
Ang negosyanteng si Jonathan Guardo kagahapon mitug-an sa mga tigbalita nga iyang gikapaniudto nga kun mahitabong modagan si Tony, mapugos si Tomas pag-itsa-puwera ni Bise Mayor Mike Rama nga hangtod karon wala gihapon makakuha sa suporta sa mayoriyang mga kapitan sa siyudad.
Ang tag-iya sa Arthro nagkanayon nga kun mahitabo kini, si Tomas mapugos pagpadagan sa iyang kapikas nga si Margot.
Kun mahitabo kini, matud niya, masubli ang eleksiyon nga mag-atbang ang Osmeña ug Cuenco.
Nahinumdom kamo sa unang pagdagan ni Tomas isip mayor sa siyudad? Si Boy Cuenco nga maoy OIC sa siyudad human sa 1986 Edsa revolution maoy gikabangga ni Tomas. Midaog si Tomas.
Atol sa pagdagan ni Tomas, walay kapitan nga iyang kaalyado tungod kay bisan ang mga konsehal loyal ni Cuenco.
Atol niadto, nahimong oposisyon ang mga Cuenco hangtod nga nag-alayon si Tony ug si Tomas. Apan si Tomas ang nabulahan tungod kay midaghan ang iyang alyado tungod kay kinsay alyado ni Tony na-alyado usab ni Tomas.
Gani, sa nangaging mga eleksiyon, kadaghanan sa mga konsehal ni Tomas dili niya orihinal nga mga tawo kun dili iya ni Tony, hangtod nga nakapundar si Tomas sa iyang liderato ug nanaghan ang iyang mga tawo – mga orihinal niyang mga tawo.
* * *
Kun si Tomas ang paminawon, mas ganahan siyang si Kongresista Raul del Mar kay kang Tony Cuenco.
Walay laing mabasol niini kun dili ang intriga sa mga kapitan nga loyal sa BOPK, ilabi na kadtong nangapilde sama kang Esther Concha sa barangay Calamba nga mihilak intawon. Apan sobra ra usab kaayo ang gipangayo ni Concha nga gipatas man unta ang suporta nga gihatag ni Tony Cuenco ngadto sa mga kapitan nga nanagan niadtong miaging barangay election. Apan ang mga kapitan sa south district nagkanayon nga bisan unsa pa nga klaseng suporta ang ibubo kang Concha, pildehonon gyud siya ni Jojo Quijano.
Apan nagtuo ko nga dili usab mosungag si Raul del Mar kang Tony Cuenco. Mao usab si Cuenco ngadto kang del Mar.
Mismo si Tony Cuenco ang misulti nga dili niya mahimong awayon si del Mar tungod sa kasuod nila nga managhigala.
Kun si del Mar usab ang pangutan-on, dili gyud kini mokomentaryo kalabot ni Cuenco.
* * *
Ang mga Garcia kinahanglang magpa-ubos niining higayona. Tinuod nga atras kaayo alang kang Alvin Garcia ang pagdagan pagka-bise mayor. Apan diin man nailhan si Alvin? Dili ba sa iya man nga pagka-bise mayor ni Tomas hangtod gipadagan siya pagka-mayor human mapupos ang tulo ka termino ni Tomas?
Nagtuo ko nga dili madawat sa mga Garcia ang tandem.
O ang mga Garcia nakadesider na nga si Raymund Garcia na lang ang ilang padaganon.
Apan maayong tan-awon nila ang ilang makaatbang. Kun si Joy Augustus Young ang kaatbang, pildehon kini ni Alvin. Dili malilong ang kadaghan pa sa mga loyal ni Alvin sa siyudad.
Apan kun si Raymund ang ilang padaganon, segurong pildehon siyang Joy Young.
Kun mas ilado si Alvin kay kang Joy Young, mas ilado si Joy Young kay kang Raymund.