Lainlaing reklamo

Kining ubos kong lindog nahimo nang sumbonganan sa mga magbabasa nga adunay mga yangungo sulod sa dugay-dugay na nga panahon. Gikahinangop ko kini sanglit mao man ing atong tinguha nga makatabang sa atong isigkatawo.

Niining bahina sa akong kolum, maoy akong hatagan og pagtagad kining lainlaing mga reklamo nga gipadangat sa mga magbabasa pinaagi sa text. Alang nako, importante kaayo ang maong mga text messages.

Ania ang una: "Good day. Unsay angay buhaton aron mahunong na ang pagpadala og info messages sa 239? Para mahunong na ang pagbawas ng load. Thank you very much." - 0928-2673058

Wala gayod akoy ideya kun unsay angay buhaton aron mahunong na kining unsolicited nga mga message nga atong madawat diin makuhaan ang atong load bisan kitay gipadad-an og mensahe gikan sa 3-digit o 4-digit numbers. Ang maayo gyod tingaling buhaton mao ang pagpaabot sa inyong reklamo ngadto sa mga network provider kay sila man ang labaw nga nasayod niini.

Mas maayo usab nga i-refer ninyo sa NTC kining maong problema. Ang NTC padayon karon sa paghimo’g pagtuon kun unsaon nga mapanalipdan ang mga cellphone user batok sa bisan unsang binuang pinaagi sa cellphone.

* * *

Nia pay lain: "Ako lang ireklamo ang Smart nga manguha og load. Bag-o pa gani ko nagpa-load, check operator dayon. Unsa man ning company sa Smart nga manguha man og load bisan wala nato gamita?" -- 0919-4151893

Angay gyod ipasabot sa Smart kun unsay hinungdan niining misteryosong pagkahanaw sa mga load. Dili lang usa kondili daghan na gayod ang nagreklamo nga nakasinati sila og ingon niini. Kanus-a pa man pamation sa Smart ang yangungo sa katawhan?

* * *

Sa laing bahin: "Good day. Ask lang ko kun legal ba ang usa ka polis nga magnegosyo og patanto o 5-6. Wala ra bay license o permit." - 0916-9902802

Ang bisan unsang negosyo o raket nga walay lisensiya maisip nga illegal, ilabi na gayod kun ang matang sa negosyo may rekisitos sa pagbaton og permit o lisensiya. Morag dili maayong pamation nga usa ka polis nagpadagan og 5-6. Ambot lang kaha kun puyde ba kining i-tolerate sa katawhan.

(Sumbong ug reklamo? Text sa 0910-8105522).