Sugboanong tradisyon

Dili g’yod kita mokompyansa sa atong panglawas karong panahona. Tungod sa grabeng kainit sa panahon, unya mokalit lang pag-uwan may posibilidad nga mahilantan ta.

Ingon niini ang nahitabo nako sukad niadtong Domingo. Bisan day-off nako ang Domingo, pero kun may balita ko mosuwat ra gihapon ko para sa The Freeman, apan niadtong Domingo dili madala sa lawas.

Niadtong Lunes, gipatawag mi’g miting si Pare Johnrey Saavedra, ang executive editor ning maong mantalaan, ni Sir Jose “Dodong” Gullas wala ko sa maayong kondisyon.

Bisan kapoy ang akong lawas, wala ko kabalibad og mibangon ko para makatunga sa miting kay ang nagpatawag mao man g’yod ang among chairman of the board.

Duna la’y project nga buot himoon ni Sir Dodong nga gipangayoan niya’g huna-huna namo, apan ako mora’g wala g’yoy natampo kay gihakop ko sa dili masabot nga kakapoy.

* * *

Buot diay ni Sir Dodong nga banhawon kadtong mga karaan na kaayo nato nga tradisyon sa mga Sugboanon aron nga bisan sa pagpanglabay sa katuigan magpabilin kining lab-as sa kaisipan sa kabatan-onan.

Kun kinsa kadtong dunay kasayoran sa mga karaan na kaayong kinaiya nga Sinugbuanon, ilabi na kun diin kini magsugod, palihug ipaambit namo.

Sama ba sa karaang tradisyon diin ang usa ka bata nga sa unang pagpakaon, ang iuna sa pagpakaon kadto kunong mga pagkaon nga aron kuno larino nga mosulti.

Kami tingali nga nagtrabaho sa radyo, gihimoan tingali niini sa among mga ginikanan. He! He! He!

Bitaw, kadtong dunay mga kasayoran kabahin sa mga karaang tradisyon, pananglit kanang ampaw ug sitsaron sa Carcar nga sikat kaayo, kinsa’y nag-una ana.

Ayaw kamo kataha, pakigkita ni Sir Dodong Gullas, kanhi kongresista sa Cebu’s first district, adto sa iyang opisina sa University of the Visayas. Kun dili mahimo nga ari namo ni Pare Johnrey.

Usa kini sa paagi nga ang mga Sinugboanon magpabilin nga lab-as sa panumdoman sa katawhan.

Nahimo man god kini kay dihay usa ka higayon nga si Sir Dodong, nagsakay og sakyanan didto sa Manila. Gipatugtog ang awit nga Ang Pasko ay Sumapit, mao kini ang tinagalog sa Kasadya ning Taknaa.

Gipahibalo sa announcer nga ang composer sa maong awit mao ang ngalan nga igo lang naghubad sa tinagalog gikan sa Binisaya. Ang Kasadya ning Taknaa gi-compose sa usa ka Sugboanon.

Mora’g karong sunod tuig tingali, tinguha ni Sir Dodong nga pasidunggan ang pipila ka Sugboanon nga naghatag og dungog kanato nga bisan sa ilang kabantog wala mauwaw nga moangkon nga siya Sugboanon.

Dili lang usa nako ipahibalo kun kinsa ang usa, basta ilado bisan sa ubang kanasuran. Ang usa ilado sa kaulohan nga dili gani mauwaw nga magbinisaya bisan sa iyang mga programa sa telebisyon.

Ang uban god nga Sugboanon, mauwaw man nga moangkon nga taga Sugbo sila kun tua na sila sa bantawan sa kabantog. Dili na lang kita mosulti og kinsa.

* * *

Nalipay diay ko kay nakadawat ko og mga feedback nga nalipay sila sa pagpasabot nato usahay dinhi sa atong lindog kabahin sa mga lagda nga gilatid sa Republic Act 4136, ang Transportation and Traffic Code.

Sagdi lang, mangayo unya ko og laing luna para niini dinhi sa Banat News kay nasayod ko nga makatabang kini aron magiyahan nato ang mga drayber unsay tukma nga lagda sa pagmaneho.