EDITORYAL - Mga drayber gipahimatngonan

Ang mga concerned citizens miawhag sa mga drayber sa bus ug minibus nga nagbiyahian dili lang sa South kundili usab sa North sa pagmatngon sa ilang pagmaneho sa sakyanan ning panahon sa Semana Santa.

Ang maong concerned citizens, sa e-mail nga ilang gipada sa publisher ning mantalaan, nagkanayon:

“Naandan na sa mga drayber nato, ilabi na kadtong nagmaneho’g sakyanan nga nagbiyahian dinhi sa amo (South Cebu), ang pagpakusog sa dagan sa ilang sakyanan ilabi na panahon sa Semana Santa diin libuan ka mga Sugbuanon ang mamauli atol sa maong okasyon.”

Angay’ng pahinumdoman kining mga kaskaserong drayber nga atol sa ilang pag-drayeb anaa sa ilang mga kamot ang kinabuhi sa ilang mga pasahero.

Ang mga operator ning maong mga sakyanan de pasahero kinahanglang mosilsil sa utok sa ilang mga drayber sa responsibilidad niini ngadto sa ilang mga pasahero kun sa kinabuhi niini.