Kanal sa Tinago

“Good day, Sir. Moreklamo lang ko kabahin sa kanal diri sa amoang dapit sa brgy. Tinago. Bisan walay ulan mobaha gyud. Ang mga tawo gud sa among dapit anha man molabay sa tanan nilang hugaw sa kanal.” -- 0928-2907387 (Sent: 11:38:51am-- November 4, 2008)

Unsa ba gyud ning buot nimong ipasabot, higalang texter? Kanal ra ba gyud kini, kanang gitawag nato og drainage? O Sapa ang buot nimong ipasabot? Hinuon, kanal man o sapa puydeng kalabayan og hugaw o basura.

Buyno, ang akong ikasulti mao nga angay ning aksiyonan sa mga brgy. opisyal sa Tinago. Lehitimo kining pagpakabana sa atong texter. Labing maayo nga mabadlong kanang mga molupyo nga anha lang molabay sa ilang mga hugaw o basura sa kanal o sapa.

Sa paglabay sa mga basura, angay natong sundon ang mga lagda sa Ecological Waste Management sumala sa gilatid sa R.A. 9003. I-segregate gyud ang mga basura ug dili kay ipataka lang og labay. Total, aduna may garbage collectors nga mohipos niana.

Manghinaot ta nga inig kapatik ning reklamo sa atong texter, naaksiyonan na ang bahin sa baradong mga kanal diha sa Tinago nga mobaha bisan walay ulan. Apan kun ugaling wala pa, hinaut unta nga mahatagan na kini’g pagtagad sa mga nahingtungdan.

* * *

Ang naggamit sa cellphone number 0921-8600539 mipasidaan nga dili gyud mamalit nianang mga tawong maglaroylaroy sa kadalanan sa pagpamaligyag mga alahas. Kay kun dili inisnats kanang ilang gipamaligya, dako’g posibilidad nga peke ang maong mga alahas.

“Nailad ang akong pag-umangkon ana. Gipalit niya ang kuwentas kay barato ra pero peke diay. Pangilad ra nang ila,” nagkanayon ang atong texter.

Busa kun mopalit mo’g alahas, adto lang sa lehitimong mga jewelry store aron dili kamo mailad.

* * *

 (Sumbong ug reklamo? Text sa 0910-8105522).