Namuril og kahoy

Gikan sa cell. no. 0906-5226592: "Good day, Sir .Grabe kaayo ang gibuhat sa usa ka principal sa elementary school diri sa amo. Karon pang tuiga ni siya na-assign diri pero nakaako na siyang pamuril sa mga dagkong kahoy diri luyo sa school. Gipamaligya ra ba kay gipalaras." -- (Sent: 09:12:36am--September 4, 2008)

Posibleng dakog tulubagon sa balaod kanang maong principal kun wala siya maghupot og permit sa pagpamuril sa mga kahoy nga nahisakop sa poder sa eskuylahan. Dili na man kita makaputol og kahoy karong panahona nga dili mananghid sa DENR.

Dugang niini, angay sab patubagon ang maong principal kun nganong ang maong mga kahoy nga propiyedad sa eskuylahan iyang gipalaras ug gibaligya, labina gyod kun ang halin niini iyang gisulod sa kaugalingon niyang bolsa, inay sa panudlanan sa eskuylahan.

I-refer ninyo sa DepEd kining maong problema. Nagtuo kong makatabang sab ninyo ang DENR. Didto sa amo sa Bohol, duna nay naghimog ingon niini niadtong early 90s. Administrastive ang akong gisang-at batok kaniya!

* * *

Niay sensitibong kasayoran nga gihatag ang usa ka magbabasa ning lindog nga naggamit sa cell. no. 0916-4759029. Ang iyang text akong nadawat niadtong Septiyembre 4, 2008 (Sent: 09:35:31 am)

Ang iyang reklamo mahitungod sa gibuhat sa usa ka brgy. opisyal sa Lapulapu City. Sumala sa alegasyon sa atong texter, ang maong brgy. opisyal nagsige'g pangayog kuwarta sa mga druglord.

Grabe na man ang gibuhat sa maong opisyal. Mao na, Sir, nga grabe na ang shabu diri," nagkanayon ang atong texter sa SMS nga iyang gipadangat sa Modus.

Tulibagbag kaayong pamation kun tinuod man. Espoko mo bay usa ka brgy. opisyal nagsige'g pangayog kuwarta sa mga druglord? Alang sa unsa man ang maong kuwarta? Protection money?

Maayo tingaling ma-counter check kini sa tanang ahensiya sa atong kagamhanan nga nagpakabana bahin sa mga kasong may kalambigitan sa drugas ug sa hiwi nga mga piniling opisyal. Atensiyon, DILG, PNP, PDEA, DDB ug uban pa.

* * *

(Sumbong ug reklamo? Text sa 0910-8105522).