Ang limos ni PGMA ngadto sa mga kabus

Tungod sa padayong pagsaka sa mga palaliton nga nakapaluya na pagmaayo sa katawhang kabus ang kagamhanan ni pangulong Arroyo migahin og tag 5.04 bilyones nga salapi matag tuig aron ihatag ngadto sa 300,000 ka mga kabus sa 20 ka pinakapobre nga probinsiya sa tibook nasud.

Ang 300,000 ka mga pamilya makadawat kini og tag 500 pesos ug laing 900 pesos alang sa maximum nga tulo ka mga anak. Kun atong sumadahon ang matag pamilya makadawat kini og tag 1,400 ka pesos matag buwan gikan sa kagamhanan. Tungod niini ang kagamhanan ni Arroyo mogahin og 420,000,000 pesos matag buwan kun lima ka bilyon kapin matag tuig. Kining maong hinabang sugdan sa pagpanghatag niining tuiga ug molungtad hangtod sa tuig 2013.

Tuyo ning maong programa nga adunay makaon ang matag lamisa natong mga kabus ug aron dili makapalta sa pagtungha ang atong mga anak.  Kasagaran man ugod sa atong mga anak mopalta sa pagtungha kay gipatabang sa pagtrabaho aron adunay makaon ang pamilya. Kun imong tutukan maayo apan kun imong sugkayon kadautan ang kapaingnan ning maong programa ngadto sa mga kabus kay maghimo lamang kini nato nga magsalig sa ilawog sa atong kagamhanan.

Ang 1,400 pesos nga limos matag buwan gikan sa kagamhanang Arroyo dili maoy tubag sa suliran sa mga kabus, hinuon nagpaubos lamang kini sa dignidad natong mga kabus. Kun imong tutukan maayo apan kun imong utingkayon pagpanglingla ang tumong sa maong programa.

Dinhi sa Pilipinas 300,000 ra ba ugod ang maglisod pagkaon matag adlaw? Di ba milyones na man kita? Di ba tulo na man ka milyon kapin ang tawo sa Pilipinas nga ubos sa balor sa usa ka dolyar ang ilang kita? Kadiyot sa, unsa ba tuod ang makaon nimo ning 1,400 matag buwan nga kun imong bahinon sulod sa 30 ka adlaw tag-46 pesos lang. Ang tawo mokaon katulo sa usa ka adlaw busa kun imong bahinon ang 46 pesos og katulo mogawas nga tag 15 pesos lamang ang imong gastohon sa matag kaon. Kun lima mo ka book sa pamilya, unsa bay makaon ninyo ning 15 pesos?

Mangaon lang mo og balig 3 pesos? Unsa bay mapalit ug makaon nimo ning 3 pesos? Kun imong tutukan maayo, maayo lamang ngadto ni pangulong Arroyo kay cute ug guwapa siya tan-awon sa mga kabus apan kun imong tugkaron gilimosan ka lang niya og balig 3 pesos. ..................................................... Adlaw karon sa mga anak sa singot busa maayong pagsaulog ninyo diha. Padayon lang gihapon ta sa atong pagpaningkamot ug pagpakigbisog.