Kalipay mo kasakit ko

Segurado nang makadawat og umento sa ilang suholan ang mga anak sa singot. Kini human magkasabot ang kagamhanan ug ang mga magpapatigayon mahitungod niini. Hinoon wa pa masayri kun pila ang madawat nga umento ug kun kanus-a kini madawat sa mga anak sa singot. Apan ang Wage Board miingon nga labing seguro sa petsa 15 o sa 30 na sa Mayo matagamtaman ang umento sa suholan.

Tungod sa pagsaka sa tanang palaliton angay ug matarong lamang gayod nga hatagan og umento sa ilang suholan ang mga anak sa singot kana tungod kay mao na lamang kini ang wa pa moumento.

Apan angayan bang ikalipay natong mga anak sa singot ang umaabot nga umento sa suholan? Di kaha mahisama na usab sa usa ka punyal nga motusok sa tagsa-tagsa nato ka mga kasingkasing ang gikatakdang umento sa suholan kana tungod kay inay kalipay mga kasakit na usab ang gidala niini?

Sa mga anak sa singot nga nakaamo og mga lapad og kasingkasing ug makamao mosabot ug motan-aw sa kahimtang sa mga anak sa singot, dakong kalipay niini ang umaabot nga umento sa suholan. Apan sa mga nakaamo og mga suwapang ug mga buaya laing kasakit na usab ang mapaabot nila. Laing higayon kini nga magtulo na usab ang ilang mga laway nga magsud-ong sa mga pariha nilang anak sa singot nga abot na sa dunggan ang ngisi tungod sa umento sa suholan nga ila nang napahimuslan. Ang kalipay nila kasakit sa uban.

Aron maputol na ang kasakit sa mga anak sa singot nga nakaamo og suwapang ug mga buaya, akong gihagit ang Regional Tripartite Wages and Productivity Board kon RTWB nga butangan og dagkong ngipon ang mga wage order nga ilang pangluwatan ug silotan ang mga kompanya nga nagpapating ug wa motuman niini. Ayaw tawon ninyo piyongi ang kahimtang sa mga anak sa singot nga kanunay lang kasakit ang napaabot sa matag higayon nga mopagawas kamo og kamandoan sa paghatag og umento sa suholan. Gawas pa, motugot ba lang diay kamo nga himoon lang kingkoy ning mga kompanyang wa motuman sa inyong kamandoan?