^

PSN Opinyon

Pag-undang sa kagubot

- Pepita Jane Petralba, Nixon Kua -

Niadtong miaging gabii, ang pipila ka kababayen-ang Muslim didto sa Mindanao mipadayag sa telebisyon sa ilang kalihokan isip tampo aron maundang ang gubat sa Mindanao. Simple apan unibersal ang ilang sugyot: paghigugma sa kalinaw, respeto sa kaugalingon ug sa isig kaingon, ug labaw sa tanan, pagtudlo sa umaabot nga henerasyon niining maong mga hiyas.

Nahinumdom ako sa sinulat ni Haring Abdullah II Bin Al-Hussein, hari sa Hashemite Kingdom sa Jordan, sa pamantalaang Newsweek. Matod pa niya, adunay sayop nga pagtuo ang kadaghanan sa kalibutan karon, ug kini mao ang pagtuo nga ang Islam nagbuot nga kinahanglan ang pagpang-atake ug kayugot, ug nga kini dili uyon sa mga malinawon nga sabot-sabot, sa demokrasya ug sa ekonomiya nga nagsumikad sa kinaadman ug impormasyon.

Matud pa niya, kining maong sayop nga pagtoo nagumikan sa sayop usab nga pagsangyaw niining pipila ka mga panatiko o extremists aron masabotahe ang ilang tinuohan, ug ang mga sayop usab nga pangagpas sa mga nasud sa Kasadpan.

Dili relihiyon ang hinungdan sa kagubot sa Mindanao ug sa terorismo sa kalibutan. Gani, maingon nato nga ang hinungdan mao ang pagtuis sa pagtulun-an sa Balaang Kasulatan (Q’uran alang sa mga igsuon natong Muslim ug Bibliya alang sa mga Kristiyano) niadtong mga tawo nga magpatuo-tuo nga magwawali sa pulong sa Labaw nga Makagagahum. Walay Ginoo sa bisan unsang relihiyon nga nagmando nga mopatay, mopasakit o magbaton og kayugot sa isig kaingon.

Sa katuyoan nga makorehir kining sayop nga pagtuo nga maoy hinungdan sa mga kagubot ug pagkamiserable sa ubay-ubay, mipagawas ang Jordan sa gitawag nga Amman Message diin gideklarar nga ang tinuod nga pagtulun-an sa Islam mao ang malinawong pagpuyo sa kalibutan uban sa lain-laing klaseng mga tawo. Gatosan ka mga scholars sa Islam gikan sa 45 ka nasud ang nagtagbo aron pagsangyaw sa maong mensahe.

Kining estoryaha susama ra usab sa ubang relihiyon. Didto sa Tibet, gikabalitang nakit-an ang pipila ka monghe nga nagbaton og mga armas ug mga pabuto. Daghang mga tawo ang nangamatay sa ilang pag-alsa batok sa pamunoan sa Tsina. Ang pangutana, dili ba ang mga monghe mga malinawon nga mga tawo, haduol sa Ginoo, ug gani ang ilang komunikasyon limitado lamang sa publiko tungod kay ang ilang kinabuhi gigugol alang sa pag-ampo? Nahasubay ba sa pulong sa Makagagahum ang ilang gibuhat?

Sa pag-adto sa Santo Papa sa Estados Unidos karon, ang mga isyu nga iyang lantawon mao kining abuso sa mga kaparian didto ug ang giingong pagkunhod sa mga Katoliko sa maong nasud. Gitohuan nga ang maong pag-abuso mao ra usay hinungdan ngano nga migawas sa pagka Katoliko ang taga-didto.

Makadungog kita'g pari nga lupig pay politiko sa ka-arogante kun mohagit sa mga opisyal sa gobiyerno. Atong hinumdoman nga wala kini siya magdala sa pulong sa Ginoo kundili sa iyang personal nga pagtuong politikanhon. Ug busa kay kini personal man, wala siya'y katungod sa pag-gamit sa pulpito tungod kay ang pulpito alang lamang sa balaanong Pulong sa Ginoo.

Ug wala usab siya'y katungod sa pagpanulti ug paglihok-lihok nga daw labaw siya kay sa balaod. Usahay man gud, malimot kining ubang pari nga dili sila mao ang Ginoo, kundili sila mga suloguon lamang sa Ginoo kansang tahas mao ang pagsangyaw sa gugma ug pagsinabtanay alang sa kalinaw sa kalibutan, dili aron pagsugnod ug pagsulsol aron moulbo ang kagubot.

Alang sa inyong mga panahom, palihug email sa [email protected]

Daghang salamat.

AMMAN MESSAGE

GINOO

MINDANAO

PLACE

  • Latest
  • Trending
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with