May krisis ba gud sa bugas?

Padayong giinsister sa kagamhanan nga walay krisis sa bugas kana tungod kay aduna gihapoy daghang klase sa bugas nga mapalit sa kamerkadohan. Hinoon giangkon sa kagamhanan nga mimahal gayod ang prisyo sa bugas. Ang mga namaligya og bugas namugos sa ilang pagtoo nga aduna gayoy krisis sa bugas tungod kay nagnihit gayod ang supply niini. May krisis ba ugod sa bugas dinhi sa nasud?

May krisis man sa bugas o wala, kining nasinati nato karon nga pagnihit sa bugas nga mimugna sa pagsaka sa prisyo niini nagpahinumdom lamang kini kanato kun unsa ka mahinungdanon ang mga mag-uuma nga usahay gipakaubos lang sa uban. Makapahigmata usab unta sa atong kagamhanan unsa ka mahinungdanon ang umahan sa katawhan ug sa nasud busa angayan lamang kining suportahan ug panalipdan gikan sa pag usab niini ngadto na sa pagka commercialize, industrialize ug uban pa.

Angayan nga hinumduman sa kagamhanan nga kun mawala ang atong mga umahan mawagtangan usab kita og mga mag-uuma, ug kon mawagtangan na kita og mga mag-uuma asa naman lang unya kita mangita og mga pagkaon sama sa bugas, mamalit sa laing kanasuran?

Gipahibawo ni Presidente Gloria Macapagal Arroyo nga ang iyang kagamhanan mipagawas og binilyon ka pesos nga salapi aron magamit sa pagpamalit og bugas gikan sa laing kanasuran apan hangtod kanus-a makalahutay ang kagamhanan sa pagpamalit ug sa pag-supply og bugas ngadto sa katawhang Pilipinhon?

Ang krisis sa bugas nagpahinumdom kanato nga dili lamang salapi ug mga kalamboan ang gikinahanglan sa katawhan, nanginahanglan usab kita og mga umahan busa gikinahanglan nga ibalanse sa atong kagamhanan ang pag-convert sa mga umahan ngadto na sa mga golf courses ug mga subdivisions. Gikinahanglan nga atong ipreserbar ang atong mga umahan gikan sa land conversion kay basin mao unya kini ang mamahimong hinungdan nga mawagtangan na og bili ang atong salapi tungod kay wa nay mapalit niini.